Lajmet e fundit | Klikoje.al

Tag: Receta

  • Bukëvale e shijshme/ Ideale për një darkë të ngrohtë

    Bukëvale e shijshme/ Ideale për një darkë të ngrohtë

    E ëmbël apo e kripur, bukëvalja mbetet përherë një nga gatimet më të hershme e të shijshme të kuzhinës tradicionale shqiptare.

    Dikur, bukëvalja përgatitej shpesh për shkak të përbërësve të saj të pakët e jo të kushtueshëm, e megjithatë shija e saj të përfshin tërësisht.

    Zakonisht nënat apo gjyshet e përgatisnin atë mëngjeseve dhe e shërbenin për gjithë familjen të ngrohtë.

    Bukëvalja përgatitej e ëmbël me sheqer e gjalpë por edhe e kripur me djathë dhe erëza.

    Që të dyja mënyrat janë krejt të veçanta në shije dhe ideale kurdoherë që ta përgatisni.

    AgroWeb.org ju sjell më poshtë një recetë fantastike të përgatitjes së bukëvales së ëmbël sipas traditës së nënave gjirokastrite.

    Në disa zona, bukëvalja përgatitet me bukë të skuqur, por sipas traditës së aneve gjirokastrite bukëvalja përgatitet me kulaç.

    Përgatitja e Bukëvales sipas traditës gjirokastrite

    Përbërësit

    500 gr miell gruri

    Një lugë kafeje kripë

    125 gr gjalpë i freskët

    1 litër e gjysmë ujë

    500 gr sheqer

    Përgatitja

    Si fillim, në një enë të gjerë shtojmë miellin, kripën dhe nisim e punojmë me duar duke shtuar ngadalë ujë të vakët derisa të krijohet një masë e butë

    Brumin e kulaçit vendoseni në një tepsi të lyer me gjalpë të freskët dhe futeni të piqet në furrë derisa sipërfaqja të bëhet transparente.

    Pasi është pjekur dhe ftohur pak, AgroWeb.org ju udhëzon që kulaçin ta thërrmoni në copëza të vogla si ato të përsheshit.

    Ndërkohë, në një tenxhere shtoni sheqerin dhe ujin dhe lëreni derisa masa të vlojë mirë dhe të behët si shurup. Në këtë moment hiqeni nga zjarri.

    Më pas, hidhni kulaçin e thërrmuar në tenxheren me shurup. Shtoni sipër gjalpë të tretur, mbylleni tenxheren me kapak dhe lëreni që copëzat e kulaçit të përthithin sherbetin.

    Lëreni të ftohet dhe shërbejeni të ndara në pjata. Bukëvales nëse preferoni mund t’i shtoni edhe pak kanellë pluhur apo arra të thërrmuara.

    Burimi: AgroWeb.org

  • Përgatisni tavën e kosit në mënyrën më perfekte

    Përgatisni tavën e kosit në mënyrën më perfekte

    E shijshme, e lehtë, ajo mbush gjithë shtëpinë me aromë të mrekullueshme, përballë shijes së saj dorëzohesh lehtësisht!

    Është e famshme ndër shekuj Tava e Elbasanit me Kos e Mish Qengji.

    Nëse ka një recetë gatimi që është tipike e kuzhinës sonë autoktone e që është gatim i përgatitur vetëm nga amvisat shqiptare, ajo është pikërisht Tava e Kosit.

    E pamundur t’i rezistosh kësaj pjate, jo vetëm nëse e ke të servirur në tryezë por edhe thjeshtë nëse e përmend apo e dëgjon diku, kjo tavë mbetet si një ndër gatimet më të jashtëzakonshme tradicionale shqiptare.

    Sigurisht, kjo recetë është ndër recetat më të preferuara të shqiptarëve. E madje, thuhet se Tava e Kosit, traditë e qytetit të Elbasanit ishte pjata e preferuar e Ismail Qemalit.

    Sipas gojëdhënave të përcjella nga të vjetrit e Kaninës, thuhet se në prag të ditëve të shpalljes së pavarësisë, kur Ismail Qemali mbërriti në Vlorë në vitin 1912, kërkoi t’i gatuanin tavën e vërtetë të kosit të Elbasanit.

    Nga ajo ditë, shumë familje shqiptare, sidomos të zonave përreth gatuajnë Tavën e Elbasanit si pjesë të gatimeve tradicionale për festën e Ditës së Pavarësisë.

    Më poshtë, AgroWeb.org u sugjeron recetën tipike të Tavës së Elbasanit, e cila mund të gatuhet krejt lehtë në shtëpi.

    Si të Përgatisim Tavën e Shijshme të Kosit 

    Përbërësit

    700 gr mish qengji i freskët (ose mish pule)

    150 gramë gjalpë

    4 kokrra vezë të freskëta

    1200 ml kos i freskët

    3 lugë gjelle miell

    Një filxhan i vogël kafeje me oriz

    Kripë

    Piper

    Përgatitja e Mishit

    Si fillim bëjmë gati mishin. E pastrojmë mirë me ujë të bollshëm dhe e vendosim të prerë në copa në tavë.

    Më pas, AgroWeb.org ju udhëzon që të gjitha copat e mishit t’i lyeni përmes një furçe me gjalpë dhe t’u hidhni pak kripë sipër dhe një një gotë me ujë.

    I vendosim në furrë që të piqen dhe i lëmë derisa të marrin ngjyrën e kuqërremtë të pjekjes.

    Pasi është pjekur e heqim nga furra dhe përgatisim salcën.

    Përgatitja e Salcës me Kos

    Kujdesemi që ujin e mbetur në tavën e mishit të pjekur ta heqim mënjanë pasi do të përdoret për përgatitjen e kosit

    Vendosim një tenxhere në zjarr dhe shkrijmë gjalpin.

    Hedhim miellin dhe e kaurdisim bashkë me gjalpin.

    Në momentin që mielli zverdhet pak, AgroWeb.org ju udhëzon të shtoni me ngadalë lëngun e mishit (të cilit i hedhim edhe gjysmë gote ujë shtesë)

    Trazojmë me lugë druri dhe pa ndalesë në mënyrë që të shmangim krijimin e kokërrizave.

    Pasi masa bëhet e njëtrajtshme e lëmë të vlojë pak dhe kur salca të jetë trashur e heqim nga zjarri dhe e lëmë të ftohet.

    Më pas, në një tas hedhim hedhim vezët dhe i rrahim fort derisa të njëtrajtësohen.

    Shtojmë kripën, pak gjalpë, piperin dhe kosin dhe i përziejmë të gjitha bashkë.

    Më pas, shtojmë salcën me miell dhe vijojmë t’i përziejmë derisa masa të jetë unison.

    Përgatitja e Tavës

    Në tavën ku kemi mishin pjekur hedhim orizin, e shpërndajmë në të gjithë tavën në mënyrë të rregulltë.

    Përzjejmë edhe mishin nga të dyja anët me oriz dhe në të gjithë tavën shtrojmë salcën e përgatitur të kosit.

    Sipër i hedhim pak gjalpë të prerë në copëza të vogla.

    Ndërkohë sigurohemi që furra të jetë e nxehtë në 200 gradë dhe fusim tavën të piqet përreth 30 minuta derisa në sipërfaqe të marrë ngjyrë të kuqërremtë.

    Pasi fikim furrën, tavën e lëmë edhe pak për t’u mpiksur mirë në nxehtësinë e sobës e më pas e servirim të ngrohtë.

    Burimi: AgroWeb.org

  • Byreçka të ëmbla shtëpie/ Të shkrifëta dhe plot shije

    Byreçka të ëmbla shtëpie/ Të shkrifëta dhe plot shije

    Shija e lehtë dhe e shkrifët e byreçkave trekëndësh është gjithnjë shumë e preferuar për çdo tavolinë.

    Përveçse shijes shumë të dashur këto byreçka janë gjithashtu dhe të lehta në përgatitje.

    Në traditën e zakonshme ato serviren si një gatim i kripur të mbushura më së shumti me djathë, gjizë apo spinaq.

    Për t’i përgatitur ato do t’ju duhen vetëm 30 minuta dhe dy përbërës që mund t’i gjeni shumë lehtë.

    Ndiqni më poshtë hap pas hapi realizimin e kësaj recetë të thjeshtë:

    Përbërësit

    1 petë sfoliat

    6 lugë çaji marmalatë molle ose ajo që ju dëshironi

    Përgatitja

    Për të përgatitur këtë recetë fillimisht AgroWeb.org ju këshillon të merrni një petë sfoliat dhe t’a hapni mbi tavolinë.

    Më pas me anë të një thike të mprehtë prisni në të 6 drejtkëshdësha mesatarë.

    Me dhëmbëzat e një piruni shponi disa herë secilin nga drejtkëndëshat pa ushtruar shumë forcë.

    Nga një anë e secilës petë shtroni në formë trekëndëshe marmelatën e mollës apo atë që ju gjendët në shtëpi dhe ju preferoni.

    Bëjeni këtë proçes në çdo petë të vogël duke i lyer ato me kujdes duke lënë pak hapësirë tek anët.

    Palosini petët e vogla njëra pas tjetrës në formën trekëndore duke ushtruar forcë tek anët e tyre me anë të një piruni.

    Mund t’i lyeni anët  e petës me pak vaj apo gjalp në mënyrë që byreçkat të mos hapen gjatë pjekjes.

    Zgjidhni një tavë mesatare, shtrojeni  atë me letër pjekje dhe vendosni byreçkat njëra pas tjetrës.

    Më pas ndizni furrën në temperaturë 200 gradë dhe lërini të piqen për 20 minuta.

    Byreçkat do të jenë gati kur të kenë marrë një pamje të artë, të lehtë.

    Pasi të jenë pjekur, nxirrini nga furra lërini të ftohen pak dhe mund t’i konsumoni menjëherë.

    Mund t’i shtoni edhe pak sheqer pluhur sipër sipas dëshirës dhe t’i konservoni në tasa të mbyllur hermetikisht për disa ditë radhazi.

    Burimi: AgroWeb.org

  • Më e mira e stinës/ Tavë me kungulleshka dhe speca të mbushura

    Më e mira e stinës/ Tavë me kungulleshka dhe speca të mbushura

    Specat dhe kungulleshkat janë dy perimet më fantastike të stinës.

    Të freskëta dhe të lehta në shije, të pasura në vlera ushqyese, ato shndërrohen në gatime të mrekullueshme.

    AgroWeb.org ju sjell më poshtë kombinimin perfekt të traditës atë të përgatitjes së tavës me speca e kungulleshka të mbushura me oriz.

    Një shije fantastike e cila shoqërohet me sallata të freskëta të stinës por edhe me kos shtëpie apo edhe dhallë të ftohtë.

    Specat dhe Kungulleshka të Mbushura me Oriz   

    Përbërësit

    3-4 speca për mbushje

    3-4 kungulleshka

    2 kokrra mesatare qepë

    4-5 filxhanë kafeje oriz

    1 filxhan çaji mish i grirë

    kripë, piper

    1 tufë majdanoz

    2-3 kokrra mesatare domate

    Disa thelpinj hudhër

    Rigon

    Përgatitja

    Specat zgjidhen me tul dhe të mëdha, lahen, u pritet bishti në formë kapaku, u hiqen farat.

    Kungulleshkat zgjidhen mesatare. Ndahen në mes por pa u prerë deri në fund dhe u largohet tuli i brendshëm.

    Specat dhe kungulleshkat kalohen në një skuqje të lehtë me vaj ulliri dhe vendosen me rradhë në tavë.

    Në një enë me vaj ulliri kaurdiset qepa e grirë hollë. Pasi volumi i qepës të bjerë shtoni domatet e grira hollë dhe tulin e prerë në kubikë të kungulleshkave dhe kaurdisini për pak minuta.

    Më pas, AgroWeb.org ju udhëzon të shtoni mishin e grirë dhe hudhrat dhe kaurdiseni derisa masa të mbetet në yndyrën e saj.

    Hidhni kripën, piperin, majdanozin, rigonin dhe ujë dhe lërini të zjejnë për 15 minuta, më pas shtoni orizin dhe lëreni të zjejë përgjysmë dhe masa të jetë e lëngshme.

    Nëse preferoni në vend të majdazonit mund të përdorni edhe kopër.

    Me masën e përgatitur mbushni specat dhe kungulleshkat me rradhë por jo plot, pasi gjatë zierjes orizi shton sasinë dhe mbushja del jashtë. Nëse u tepëron oriz nga masa e mbushjes pasi të keni mbushur specat hidhjani tavës rreth e rrotull specave.

    Në fund tavës hidhini dhe pak kripë, pak lëng mishi ose ujë dhe futeni të piqet në furrë të parangrohur.

    Burimi: AgroWeb.org

  • Si të përgatisni vetë në shtëpi marmalatën e shijshme të ftoit

    Si të përgatisni vetë në shtëpi marmalatën e shijshme të ftoit

    Marmalata e ftoit përgatitet krejt lehtë dhe është fantastike për t’u konsumuar në çdo stinë.

    Të gjitha llojet e reçelit dhe marmalatave shqiptare janë fantastike, të shijshme e plot ëmbëlsi, por si shija e marmalatës të ftoit nuk ka!

    Është e pamundur të mungojë në kuzhinën e amvisave shqiptare, të cilat e përgatisin çdo vit plot delikatesë ndërsa e përdorin në receta të ndryshme në përgatitjen e ëmbëlsirave.

    Ato janë fruta me një shije të veçantë që plotësojnë çdo ushqim tjetër të kripur, pikant apo të ëmbël.

    Kur gatuhen, ftonjtë transformohen në një marmalatë me një ëmbëlsi intensive, nga ata që të bëjnë të lëpish gishtat.

    Receta e marmalatës të ftoit që do të mësoni në këtë artikull të ArgoWeb.org përgatitet krejt lehtë në shtëpi ndërsa ka një avantazh superior shijeje.

    Përgatitja e Marmalatës së Ftoit

    Përbërësit

    2 kg ftonj

    Lëkurën e gjysmës së një limoni

    Tre lugë gjelle me lëng limoni

    500 – 600 g sheqer

    Përgatitja

    Si fillim, AgroWeb.org ju udhëzon të lani me ujë të bollshëm ftonjtë dhe t’i qëroni nga lëkura dhe bërthamat, e më pas pritini në copa.

    Në një tenxhere hidhni lëkurën e limonit të qëruar shtoni dhe ftonjtë e prera dhe mbulojini me ujë.

    Vendoseni tenxheren në zjarr dhe lëreni masën që të zjejnë.

    Pasi të kenë marrë valë, ulni nxehtësinë dhe vendosini kapakun tenxheres. Lërini ftonjtë që të ziejnë dhe për 30 – 40 minuta të tjera.

    Kështu kur t’i kulloni ata do të jenë të butë sa do të shtypen dhe me pirun.

    Pasi të ketë kaluar koha e nevojitur, kulloni ftonjtë dhe mund t’i shtypni në kullore me një lugë, ose t’i vendosni në grirësin elektrik (mikser).

    Ftonjtë do të krijojnë një formë pureje, të cilën do ta kaloni përsëri në tenxhere.

    AgroWeb.org ju këshillon që ta masni purenë e ftonjëve, sa gota me pure të keni aq gota me sheqer do të hidhni.

    Vendoseni përsëri tenxheren në zjarr të ngadaltë derisa sheqeri të shkrijë plotësisht. Pasi kokrrizat e sheqerit të jenë shkrirë shtoni lëngun e limonit.

    Vazhdoni ta përzjeni derisa masa të fillojë të ndryshojë ngjyrë dhe të mpikset.

    Masa do të marrë një ngjyrë të thellë kafe transparente, dhe do të jetë e trashë.

    Në vijim, ngrohni furrën e sobës në 70 gradë celsius.

    Në një tavë jo shumë të madhe vendosni një letër pjekjeje lyejeni me pak gjalpë dhe hidhni masën me ftonj.

    Me ndihmën e një luge drejtojeni në mënyrë që trashësia të jetë e njëjtë në të gjithë sipërfaqen.

    Vendoseni tavën në furrën e parangrohur përreth një orë, në mënyrë që të thahet plotësisht.

    Ky proces do t’i japë marmalatës dhe formën e saj karakteristike.

    Më pas hiqeni nga furra dhe lëreni të ftohet.

    Për ta ruajtur mjafton vetëm ta largoni nga tava dhe ta mbështillni me qese kuzhine ose ta vendosni në një enë qelqi me kapak në frigorifer. 

    Burimi: AgroWeb.org

  • Receta shumë e thjeshtë e brioshëve me tre përbërës

    Receta shumë e thjeshtë e brioshëve me tre përbërës

    Një briosh shtëpie dhe një filxhan me kafe apo çaj do të ishte zgjedhja ideale për një mëngjes të lehtë, të shijshëm për të nisur ditën me humor të mirë e pozitivitet

    Ku Lindi Brioshi, Në Austri Apo Francë?

    Njerëzit shpesh mendojnë se brioshi është një krijesë e ëmbël e Francës, megjithatë, vendlindja e saktë e brioshit është Viena e Austrisë.

    Ekspertët vienezë kanë qenë të parët që kanë krijuar ‘kipferi’ një gatim me petë në formën e gjysmë-hënës i mbushur me gjëra të ëmbla dhe arrorë.

    Historitë dhe gojëdhënat për këtë ëmbëlsirë datojnë që në shekullin e 13-të.

    Fama e brioshëve mendohet që arriti kulmin falë debulesës që Dukesha Maria Antoinette kishte për këto gatime të ëmbla dhe që i bëri të preferuarit e shoqërisë.

    Vetëm në gjysmën e parë të shekullit të 20-të brioshët nisën të piqeshin nga bukëpjekësit francezë dhe pas luftës së dytë botërore, nisi prodhimi masiv i tyre.

    Në AgroWeb.org do të mësoni një recetë të thjeshtë për përgatitjen e brioshëve me vetëm tre përbërës, pa pasur nevojë të jesh një bukëpjekës francez.

    Përbërësit:

    500 gr miell

    100 gr sheqer

    150 gr gjalpë

    Një filxhan çaji kos natyral

    3 të verdha vezësh

    Një lugë e vogël me kanellë pluhur

    Gjysëm kavanozi çokokrem

    Përgatitja:

    Si fillim hedhim në një tas të madh miellin, gjalpin dhe sheqerin. I kalojmë të gjitha në mikser derisa të jenë përzjerë mirë me njëra tjetrën.

    Më pas shtojmë të verdhat e vezëve bashkë me kosin dhe kanellën dhe vijojmë t’i përzjejmë në mikser derisa brumi të jetë i njëtrajtshëm.

    E hedhim brumin në një enë tjetër dhe e punojmë me dorë për disa minuta.

    Më pas brumin e mbështjellin me një letër kuzhine dhe e lëmë të pushojë për 30 minuta në frigorifer.

    E nxjerrim nga frigoriferi dhe e hollojmë në formën e petës në një trashësi prej 2 mm.

    Më pas, petën e presim në forma trekëndore.

    Në secilin prej trekëndëshat hedhim nga një lugë çokokrem.

    I mbyllim në formë roleve duke shtypur me kujdes të dyja anët e brioshit.

    I vendosim në tavë ku më parë kemi shtruar një letër pjekjeje.

    Pasi i kemi vendosur të gjithë me radhë në tavë, brioshët i fusim në furrë të ngrohur në 180 gradë.

    I pjekim për 25 minuta, i nxjerrim nga furra dhe i lëmë të ftohen.

    Sipas preferencës, para se t’i shërbejmë i spërkasim me pak sheqer pluhur.

    Burimi: AgroWeb.org

  • Krepa me mollë/ Receta e veçantë që duhet të provoni

    Krepa me mollë/ Receta e veçantë që duhet të provoni

    Janë nga ushqimet që mund t’i shijoni të ëmbla apo të kripura dhe shijohen nga kushdo.

    Krepat janë lezeti i mëngjesit, por jo vetëm ato shijohen në shtëpi, në rrugë në bare apo restorante gjatë gjithë ditës.

    Në mesin e kombinimeve të pafundëme për krepat aromatikë, sot ju sugjerojmë diçka ndryshe.

    Shumë të shëndetëshme e plot shije, krepat me mollë do të jenë ëmbëlsia juaj e preferuar.

    Përbërësit

    3 vezë

    2 mollë të ëmbla

    250 g miell

    500 ml qumësht

    Pak kripë

    Pak sheqer

    Gjalpë i freskët për pjekjen e tyre

    Përgatitja

    Si fillim nisni me përgatitjen e vezëve, mjafton t’i thyeni ato në një tas të madh dhe t’i rrihni duke shtuar ngadalë qumështin.

    AgroËeb.org ju sugjeron që të mos ndaloni përzierjen e përbërësve derisa ata të kenë krijuar një masë homogjene.

    Merrni një tas tjetër dhe sitni miellin, kripën dhe sheqerin duke u siguruar që kokrrizat e miellit që mund të jenë ngurtësuar të mos i hidhni tek masa.

    Me lugë filloni dhe t’i shtoni tek tasi i vezëve, duke treguar kujdes që para se të shtoni lugën e radhës, mielli të jetë tretur plotësisht.

    Një metodë e tillë do të shmangë krijimin e kokrrizave të miellit të cilat mbeten dhe pas pjekjes, duke i prishur shijen krepave.

    Vazhdoni kështu derisa të keni mbaruar të gjithë miellin dhe masa të jetë plotësisht kremoze.

    Në këtë moment mbulojeni tasin me një qese kuzhine dhe lëreni që të pushojë përreth 30 minuta në frigorifer.

    Ndërkohë prisni mollët në feta të holla dhe lërini në një enë për t’i përdorur gjatë pjekjes së krepave.

    Pjekja e krepave

    Kur të ketë kaluar koha nxirreni tasin nga frigoriferi dhe ndërkohë keni vendosur një tigan të lyer mirë me gjalpë në zjarr.

    Vetëm kur tigani të jetë nxehur plotësisht hidhni përafërsisht një garuzhde.

    Niseni nga mesi i tiganit e më pas duke e rrotulluar atë, përhapeni në mënyrë të njëtrajtshme në të gjithë sipërfaqen.

    Në mes të brumit shtoni një nga një edhe fetat e mollëve që pretë më parë, në formën e një luleje.

    Lëreni krepin të piqet derisa të thahet brumi plotësisht e të marrë ngjyrë të artë e më pas me anë të një spatula kthejeni brumin nga ana tjetër.

    Krepin apo palaçinkën piqeni përafërsisht deri në  4-5 minuta në njërën anë dhe 2-3 kur e ktheni nga ana tjetër.

    Këtë metodë bëjeni më të gjithë fetët e mollëve dhe brumin e mbetur të krepave tuaj.

    Për çdo krep të ri që do të përgatisni lyejeni tiganin lehtë me pak vaj.

    Në fund spërkatini krepat tuaj të veçantë me pak sheqer pluhur apo kanellë.

    Burimi: AgroWeb.org

  • Sekretet e shefave të kuzhinës për pjekjen e patates

    Sekretet e shefave të kuzhinës për pjekjen e patates

    Pjekja e patates në furrë tingëllon si gjëja më e lehtë në botë, por kjo nuk e bën këtë perime të nëntokës si më të shijshmin vakt që keni gatuar.

    Shefat më në zë të kuzhinës thonë se metodat e pjekjes së patates janë shumë të larmishme që do të thotë se gatimi i saj nuk ka përse të jetë i mërzitshëm.

    Si Ta Gatuani Pataten Në Furrë Në Mënyrë Perfekte

    Patatja e pjekur siç duhet duhet të jetë krokante nga jashtë dhe e butë si pambuk për brenda.

    Për një vakt më të pasur, ekspertët këshillojnë mbushjen e patates me speca djegës, krem djathi, qepë, ullinj, domate e shumë të tjera.

    Rregullat e Arta Të Pjekjes së Patates

    Ekspertët, të cileve u referohet AgroWeb.org sugjerojnë se nëse dëshironi të gatuani një vakt shumë të shijshëm e plot fantazi me patate të pjekura të ndiqni këto rregulla:

    Përmasat e patateve që do të piqni duhet të jenë të ngjashme ose të njëjta.

    Furra duhet ndezur gjithmonë përpara pjekjes në temperaturë 200 gradë.

    Patatet duhen larë dhe fërkuar fort me ujë të bollshëm dhe sfungjer të pastër për të larguar të gjitha papastërtitë.

    Pas larjes, patatet duhen tharë me letër kuzhine.

    Më pas, duhet t’i lyeni patatet me vaj ulliri. Kjo yndyrë e shëndetshme do e bëjë lëkurën të shijshme dhe krokante.

    Pasi t’i keni lyer të gjitha patatet me vaj, spërkatini me kripë dhe vendosini në skarën e furrës.

    Patatet duhet t’i piqni për rreth 45-60 minuta.

    Për të kuptuar nëse janë pjekur, shpojini me majën e pirunit që të vëreni nëse janë të buta apo jo.

    Pasi t’i keni hequr nga furra, lërini patatet të ftohen për 5 deri në 10 minuta.

    Prijini sipas gjatësisë me një thikë të mprehtë dhe më pas hapeni në të dyja anët duke përdorur duart.

    Në këtë pikë, patatja është gati për mbushje.

    Tek kjo e fundit, ju mund të nxirrni në pah fantazinë tuaj dhe ta mbushni atë me erëzat, barishtet dhe produktet më të preferuara të bulmetit.

    Kësisoj do të keni krijuar për veten dhe familjen, një vakt të shijshëm e plot fantazi.

    Burimi: AgroWeb.org

  • Koha ideale për të shijuar oshmarin e ngrohtë/ Ja si ta përgatisni

    Koha ideale për të shijuar oshmarin e ngrohtë/ Ja si ta përgatisni

    Oshmari është traditë e vjetër e gjithë rajonit të Korçës, përbërësi kryesor i të cilit është mielli i misrit.

    Megjithatë ky gatim, ndonëse mund të ndryshojë pakëz në përbërësit e tjerë gatuhet në të gjitha trevat shqiptare.

    Diku njihet me emrin Harapash, diku tjetër me emrin Kaçamak, Oshmar në Korçë e kështu me radhë por shija e tij është unike dhe të përfshin tërësisht.

    Dikur oshmari i Korçës shërbehej gjatë mëngjeseve për të marrë energji gjatë ditës, ndërsa sot është ndër gatimet më tipike që gjendet në menutë e restoranteve tradicionale dhe një ndër gatimet që ka tërhequr përherë turistët e huaj.

    AgroWeb.org ju sugjeron më poshtë përgatitjen e Oshmarit sipas traditës së amvisave korçare.

    Përgatitja E Oshmarit Krejt Lehtë Në Shtëpi

    Përbërësit:

    • 2 lugë gjelle gjalpë të freskët ose 4 lugë vaj ulliri
    • 3 lugë gjelle djathë i thërrmuar (i bardhë ose kaçkavall sipas preferencës)
    • 2 gota uji me qumësht
    • 1 gotë me ujë
    • 2 filxhanë çaji me miell misri

    Përgatitja:

    Vendosim një tenxhere në zjarr dhe shtojmë aty gjalpë të freskët.

    E lëmë sa të shkrijë dhe më pas shtojmë djathin e bardhë të thërrmuar.

    Nëse do përdorni djathë kaçkavall atëherë do duhet që ta shtoni në fund të përgatitjes së oshmarit.

    E kaurdisim pak dhe më pas shtojmë qumështin dhe ujin.

    I lëmë të ziejnë derisa të marrin valën e parë, e më pas menjëherë shtojmë miellin e misrit.

    E përziejmë shpejt dhe pa ndërprerje me një lugë druri në mënyrë që të mos krijohen kokërriza.

    Përzihet derisa masa të shkëputet nga anët e enës.

    Ndahet në pjata lugë-lugë dhe sipër i hidhet pak djathë i thërrmuar.

    Nëse dëshironi, para se ta piqni plotësisht në tenxhere dhe pasi ka nisur të trashet, oshmarin mund ta fusni edhe për 15 minuta në furrë të parangrohur sa sipërfaqja të marrë një ngjyrë të kuqërremtë.

    Burimi: AgroWeb.org

  • Ëmbëlsirë dhe shëndet/ Biskota me pure kungulli

    Ëmbëlsirë dhe shëndet/ Biskota me pure kungulli

    Kungulli është një perim me super veti ushqyese, i pasur me vitamina dhe minerale, por me pak kalori dhe ka pafund mënyra për tu përfshirë në dietë, sa do të habiteshit.

    Që nga ëmbëlsira, sallata, byrek me kungull madje-madje mund të jetë një zëvendësues shumë i mirë dhe i gjalpit.

    Në këtë artikull të AgroWeb.org, do të mësoni një recetë intersante të biskotave me pure kungulli.

    Përbërësit:

    • 170 gramë miell bajamesh
    • 25 gramë miell ananasi
    • Çerek luge çaji sodë buke
    • Çerek luge çaji kripë të hollë
    • Një lugë e gjysmë çaji kanellë pluhur
    • Gjysmë luge çaji xhenxhefil të grirë
    • Çerek luge çaji arrëmyshk pluhur
    • Një majë luge çaji karafil pluhur
    • 4 lugë gjelle gjalpë pa kripë, të shkrirë e të ftohur,
    • Treçerek filxhan çaji pure kungulli
    • 50 gramë ëmbëlsues artificial
    • 1 lugë gjelle pekmez
    • 1 vezë të madhe
    • 1 lugë çaji vanilje

    Për kremin:

    • 120 gramë krem djathi
    • 4 lugë gjelle gjalpë pa kripë
    • 3 lugë gjelle ëmbëlsues artificial
    • Çerek luge çaji vanilje pluhur
    • Një majë luge çaji kripë

    Përgatitja:

    Në një enë mesatare përzieni miellin e bajames me atë të kokosit dhe shtoni sodën e bukës, kripën, kanellën, xhenxhefilin, arrëmyshkun dhe karafilin.

    Në një enë tjetër më të madhe rrihni gjalpin me purenë e kungullit, ëmbëlsuesin artificial, pekmezin, vezën dhe vaniljen.

    Më pas bashkoni të dyja masat deri sa të formoni një brum të butë dhe të lëmuar pa kokrriza.

    Futeni atë në frigorifer dhe mbajeni për 30 minuta e sakaq ndizni furrën.

    Në tavën e pjekjes shtroni letrat përkatëse të pjekjes dhe nxirrni brumin nga frigoriferi.

    Përdorni lugën për të marrë nga pak nga brumi dhe formoni toptha të vegjël të cilët duhet t’i sheshoni me pëllëmbën e dorës dhe tu jepni formën e preferuar.

    Secilën prej topthave vendoseni në tavë duke lënë hapësirë nga njëri tjetri. Ato duhen pjekur për 10-12 minuta ose deri sa të marrin një ngjyrë të artë.




    Hiqini nga furra dhe lërini të ftohen dhe nisni përgatitjen e kremit.

    Në një enë tjetër rrihni kremin e djathit dhe gjalpin. Ju mund të përdorni edhe një mikser elektrik dhe gjatë përpunimit të shtoni vaniljen, ëmbëlsuesin artificial dhe kripën.

    Përzierja duhet të jetë e vazhdueshme deri sa i gjithë kremi të jetë i lehtë dhe i shkrifët.

    Kur biskotat të jenë ftohur plotësisht lyejini në sipërfaqe me kremin dhe servirini.

    Nëse dëshironi t’i ruani për më vonë, sigurohuni që biskotat të jenë të mbuluara ose në frigorifer.

    Burimi: AgroWeb.org