Mungesa e Marçelino Prekës ka ndikuar drejtpërdrejt në planet e Partizanit në merkato. Mbrojtësi shkodran po përjeton një periudhë të vështirë për shkak të dëmtimeve, që prej muajsh nuk e kanë lejuar të jetë në dispozicion të plotë të skuadrës.
Situata është bërë edhe më serioze në fundin e muajit maj, kur Preka iu nënshtrua një ndërhyrjeje kirurgjikale në Kroaci. Operacioni ishte i nevojshëm për një dëmtim delikat, i cili ka vijuar ta shqetësojë prej një kohe të gjatë.
Preka ka provuar të rikthehet në fushë edhe në disa ndeshje, por problemet fizike janë shfaqur sërish, duke e detyruar të ndalet. Tashmë objektivi është që lideri i prapavijës së kryeqytetasve të jetë gati për muajin shtator, që për momentin shihet si skenari më optimist për rikthimin e tij.
Pikërisht kjo situatë ka bërë që Partizani të mos rrezikojë dhe të ndërhyjë në merkato. “Demat” kanë forcuar qendrën e mbrojtjes me dy afrime, Omar Pasagiç dhe Alesio Mija, duke kërkuar më shumë alternativa në prapavijë deri në rikthimin e Prekës.
Tashmë mbetet për t’u parë nëse mbrojtësi shkodran Marçelino Preka do të mund të rikthehet sipas planit në shtator apo rikuperimi do të kërkojë edhe më shumë kohë.