Gugash Magani prezantohet zyrtarisht si trajner i Lushnjes. Kishte ditë që ishte arritur akordi, por zyrtarizimi erdhi ditën e mërkurë. Tekniku peqinas u shfaq në ambjentet e stadiumit së bashku me kryebashkiaken e Lushnjes, Eriselda Sefa që është dhe njëkohësisht presidentja e klubit lushnjar. Trajneri foli për objektivat e skuadrës, por edhe për djalin e tij Endrien Magani që është pjesë e skuadrës.
“Presidentja e klubit më ka kontaktuar edhe herë të tjera, ndihem i privilegjuar. Për mua është një farë vlerësimi që jam këtu, për mua Lushnja është një skuadër si të gjitha ekipet e Superiores, ka histori ka traditë. Kam firmosur një kontratë 1+1, nëse të dyja palët do të jenë të kënaqur atëherë mund të vazhdoj dhe sezonin e ardhshëm.”
MERKATO– Duhet të jemi të kujdeshshëm në zgjedhje. Kush lojtar ka kontribuar dhe ka bërë histori me Lushnjen do të jenë pjesë e projektit tim. Padyshim që do të punojmë për të përforcuar skuadrën.
OBJEKTIVAT– Po ti referohemi viteve të fundit, Lushnja ka luajtur për mbijetesë. Unë nuk e kam në karakter të luajë për mbijetesë. Natyrisht do të punojmë që të jemi në unitet dhe të jemi për në Superiore, objektivi më i realizueshëm është vendi i katërt, por me punë mund të arrijmë gjithckak.
ENDRIEN MAGANI- Kur fola pak më parë për lojtarët lushnjarë, unë mendoj se Endrieni është pjesë e Lushnjes pasi ka kontribuar për shumë vite. Nuk do ishte normale, që të vinte babai dhe ta hiqte nga skuadra. Endri do ti nënshtrohet të gjitha rregullave, dhe nëse e meriton do të jetë në fushën e lojës.
