Tag: Edi Rama

Avokati Spartak Ngjela tha në një intervistë mediatike është shprehur se nëse vërtetohet nga drejtësia amerikane që është i implikuar në çështjen e ish-zyrtarit të FBI, Edi Rama ekstradohet në SHBA.

Ngjela u shpreh se kjo nuk është çështje e pushtetit gjyqësor shqiptar, por e atij amerikan, që nëse e gjen Ramën të përfshirë në këtë aferë e cila ka lidhje edhe me Rusinë, e ekstradojnë pa pasur nevojë ta shpallin non grata.

“Nëse del i implikuar kryeministri shqiptar në një çështje si ajo e ish-zyrtarit të FBI që e ka refleksionin në Moskë, ekstradohet kryeministri shqiptar.

Nuk ka prova, ndryshe SHBA s’ka nevojë ta shpallë non grata, e ekstradojnë ata, e marrin atje. Kanë bërë ligj të ri për pushtetarët në Shqipëri; po të kesh shkelur ligjin amerikan të ekstradojnë direkt”, tha Ngjela.

Allison Guerriero, ish- e dashura që denoncoi ish-zyrtarin e FBI Charles McGonigal, ka dhënë detaje lidhur me takimin e tij me kryeministrin Edi Rama. Ajo tha se nuk e dinte arsyen e takimin mes Ramës dhe McGonigal, por që të dy flisnin  në telefon dhe se ishin miq.

Më tej Guerriero theksoi se ish-zyrtari i FBI-së i tregonte se Ramën e kishte mik të mirë, ndërsa u shpreh se nuk ishte takuar asnjëherë me Agron Nezën, mirëpo tha se Charles e ka përmendur shpesh herë dhe se së bashku kanë udhëtuar në disa vende, madje kanë shkuar edhe në Kosovë.

“Nuk e di se cilat ishin marrëveshjet nuk më kujtohen se çfarë kishte në atë email se isha e dehur. Di gjë ai do të shkonte në Shqipëri dhe do të kthehej në Kosovë pa i treguar FBI, kjo është ajo që di. Ai do të shkonte të takohej me kryeministrin Rama, nuk më thoshte kush ishte objektivi i takimit

Besoj se ishin miq personal dhe flisnin në telefon me njeri tjetrin. Charles ka marrë në telefon kryeministrin Rama në prezencën time, jo shpesh por më thoshte që e kishte mik të mirë po kaq.

Unë nuk e kam takuar zotin Nezën, Charle e ka përmendur që ishte një mik i vet por kaq, që kishin udhëtuar bashkë në Shqipëri, në Vjenë dhe që kishin shkuar me makinë nga Shqipëria në  Kosovë”, tha ajo për “Euronews”.

Në SHBA po dalin cdo ditë detaje të reja nga dosja e ish-zyrtarit të lartë të FBI-së McGonigal që është vendosur në hetim. Në një artikull të publikuar sot “Businessinsider” shkruan se ka qenë e dashura e McGonigal që ka vendosur në lëvizje FBI-në për lidhjet e ish-agjentit me kryeministrin e Shqipërisë, Edi Rama.

“Allison Guerriero i dërgoi një email William Sweeney, që ishte në krye të zyrës së FBI-së në New York City dhe që, kujton ajo, e kishte prezantuar për herë të parë me McGonigal. Ajo kujton se i tha Sweeney-t në email se ai duhet të shikonte lidhjen jashtëmartesore dhe gjithashtu marrëdhëniet e McGonigal në Shqipëri.

McGonigal tashmë ishte miqësuar me kryeministrin e Shqipërisë dhe kishte udhëtuar gjerësisht në vend. Marrëveshje që do të shfaqeshin më vonë në një nga aktakuzat e tij. Guerriero i tha Insajderit se e kishte fshirë emailin.

Sweeney nuk iu përgjigj një kërkese për koment të bërë përmes punëdhënësit aktual të Sweeney, Citigroup. Insajderi nuk mund të konfirmonte që Guerriero e kishte dërguar emailin ose që Sweeney e kishte marrë atë. Pavarësisht, deri në nëntor 2021, FBI po shqyrtonte McGonigal.

Dy agjentë u shfaqën në derën e Guerriero-s, thotë ajo, i treguan asaj një foto të McGonigal me kryeministrin shqiptar dhe e intervistuan për ndërveprimet e tyre. Ajo gjithashtu mori një thirrje nga juria e madhe që kërkonte të gjitha komunikimet e saj me McGonigal, si dhe informacione për çdo “pagesë ose dhuratë” që ai mund t’i ketë dhënë asaj” thuhet në shkrim.

Kryeministri Rama ka reaguar për emisionin “Opinion”, lidhur me përmendjen e emrit të tij gjatë hetimit për ish-funksionarin e FBI, Charles McGonigal. Përmes një deklarate të përcjellë nga zyra e tij e shtypit, Rama shprehet se konkluzioni i hetimit s’ka asnjë lidhje me të apo  me qeverinë shqiptare.

Në vijim të reagimit, Kryeministri deklaron se sa u takon parave të marra nga rusët për lobimin e PD, “nuk janë shpikje, po fakt po ashtu i hetuar dhe i provuar botërisht”.

Zyra e Shtypit te Kryeministrit, deklarate e Kryeministrit

Ky mal i madh mbarsur me fantazi dhe ligësi, do të pjellë edhe më pak se një mi. Fatmirësisht gjithçka është e hetuar në SHBA dhe konkluzioni i hetimit s’ka asnjë lidhje me mua a me qeverinë shqiptare. Paratë e marra prej rusëve nga PD nuk janë shpikje, po fakt po ashtu i hetuar dhe i provuar botërisht. Deri dje thoshin Edi Rama dhe Sorosi, sot thonë Edi Rama dhe zyrtari i lartë i FBI, por si njëra si tjetra bien përtokë përballë fakteve të hetuara. Në këtë çështje zyrtari i lartë i FBI nuk akuzohet fare për asgjë nga këto që fliten me ulërima në Shqipëri, po vetëm për konflikt interesi në marrjen e borxhit nga miku i vet shqiptaro-amerikan dhe mosdeklarim të tij.

Edhe më qesharake janë akuzat për përfshirjen e oligarkut rus në biznes në Shqipëri, si pjesë e këtij konspiracioni agjenturor të tipit kinematografik “Fije që priten”. Kompania Strabag është flamuri më i madh i ekonomisë austriake, e cila ashtu si edhe kompania Trema operojnë në Shqipëri prej dekadash. Të lidhësh një aksioner rus të këtyre kompanive (i cili së fundmi është përjashtuar prej tyre si një individ nën sanksionet e luftës) me këtë përrallë që edhe pa të është krejt groteske, do të thotë të jesh në dëshpërim total.

Dihet që njerëz të dëshpëruar bëjnë gjëra të dëshpëruara dhe kjo histori është pasqyrë besnike e dëshpërimit të opozitës sonë, e cila përveçse s’ka kokë ka mbi kurriz çështje madhore si Gërdeci, 21 janari apo edhe lidhjet ruse qysh në kohën kur bashkoi votën me partinë e Putinit në Këshillin e Europës kundër Ushtrisë Çlirimtare të Kosovës. Të gjitha këto janë fakte që kërkojnë drejtësi, jo teori konspiracioni dhe s’ka teori konspiracioni që i varros dot në harresë.