Një emër i ri mund t’i shtohet listës së alternativave për portën e Kombëtares shqiptare. Bëhet fjalë për portierin italian të Cagliarit, Elia Caprile, i cili, sipas raportimit të SuperSport, ka nisur procedurat për të përfituar pasaportën shqiptare. Lidhja e tij me Shqipërinë vjen përmes bashkëshortes shqiptare, ndërsa 25-vjeçari shihet si një opsion potencial për të mbrojtur në të ardhmen portën kuqezi.
Caprile është aktiv me Cagliarin dhe gjatë karrierës së tij ka qenë pjesë edhe e ekipeve kombëtare të moshave të Italisë. Një kalim te Kombëtarja shqiptare do të përbënte një rast të veçantë, pasi Caprile nuk ka prejardhje shqiptare dhe lidhja e tij me vendin vjen përmes martesës.
Nëse procedurat për pasaportën përfundojnë me sukses dhe lojtari bëhet i disponueshëm për përfaqësuesen, Shqipëria do të kishte një alternativë të re në portë, me një futbollist që ka eksperiencë në futbollin italian dhe në përfaqësueset e moshave të Italisë.