Shqipëria e ka mbyllur me sukses misionin në Ligën e Kombeve. Kuqezinjtë kanë bërë detyrën në ndeshjen vendimtare ndaj Bjellorusisë, duke triumfuar me rezultatin 2-0 dhe duke siguruar vendin e parë në grupin C1.
Ishte një fitore me shumë peshë për Kombëtaren, që jo vetëm siguroi ngjitjen në Ligën B, por edhe një pozicion më të favorshëm në shortin e kualifikueseve të Europianit, ku do të jetë në vazon e tretë.
Manaj zhbllokoi sfidën në minutën e 28-të, ndërsa Hysaj dyfishoi shifrat në të 57-ën. Kuqezinjtë nuk u mjaftuan me administrimin e rezultatit, por vijuan të kërkonin golin, duke treguar se synimi ishte vetëm fitorja.
Misioni u përmbush. Shqipëria fiton grupin, rikthehet në Ligën B dhe sheh tashmë drejt shortit të 6 dhjetorit në Belfast, me një objektiv të ri përpara.