Vllaznia vijon të lëvizë me shpejtësi në merkaton e verës dhe ka siguruar një tjetër afrim me peshë për sezonin e ri. Burime pranë klubit bëjnë me dije se kuqeblutë kanë arritur marrëveshjen me mesfushorin Herald Marku, i cili tashmë ka hedhur firmën mbi kontratë dhe do të jetë pjesë e skuadrës shkodrane për edicionin 2026/27.
Marrëveshja mes palëve është mbyllur me sukses dhe tashmë mbetet vetëm zyrtarizimi nga ana e klubit, i cili pritet të vijë në orët ose ditët në vijim. Rikthimi i 30-vjeçarit në Shkodër konsiderohet një lëvizje e rëndësishme për ndërtimin e skuadrës që do të përfaqësojë Vllazninë në sezonin e ardhshëm.
Trajneri Edi Martini e vlerëson mesfushorin si një element me eksperiencë dhe cilësi, i aftë për t’i dhënë më shumë ekuilibër dhe forcë repartit të mesfushës. Pas disa largimeve të paralajmëruara në kampin kuqeblu, afrimi i tij shihet si një hap i rëndësishëm për të ruajtur nivelin konkurrues të skuadrës.
Drejtuesit e Vllaznisë ndërkohë nuk pritet të ndalen këtu, pasi merkatoja mbetet e hapur dhe po punohet edhe për afrime të tjera. Synimi është ndërtimi i një grupi sa më konkurrues për objektivat e sezonit të ri, me kuqeblutë që duan të jenë protagonistë si në kampionat ashtu edhe në arenën europiane.