Shorti i turit të parë të Champions League i ka vendosur përballë Egnatias kampionët e Moldavisë, ekipin e FC Petrocub Hîncești. Në letër, skuadra nga Hînçești konsiderohet një kundërshtar i kalueshëm, por jo për t’u nënvlerësuar.
Petrocub vjen si kampion i Moldavisë, pasi riktheu titullin në sezonin 2025-26 dhe siguroi sërish pjesëmarrjen në eliminatoret e Champions League. Klubi është ngritur ndjeshëm vitet e fundit, duke sfiduar dominimin historik të FC Sheriff Tiraspol. Në vitin 2024 fitoi për herë të parë kampionatin moldav, ndërsa në arenën europiane arriti të kalonte disa ture kualifikuese, duke treguar organizim dhe disiplinë taktike.
Forca kryesore e Petrocubit mbetet loja kolektive dhe mbrojtja e fortë. Skuadra nuk ka yje të mëdhenj në përbërje, por njihet për kompaktësinë dhe përvojën në ndeshjet europiane. Vlera e ekipit llogaritet rreth 4.7 milionë euro, duke e renditur mes klubeve më të forta të kampionatit moldav.
Për Egnatian, shorti paraqet një mundësi reale për të synuar kalimin e turit. Kampionët shqiptarë shmangën kundërshtarë më të fortë në short dhe do të kërkojnë një rezultat pozitiv në Moldavi për ta mbyllur llogarinë në Rrogozhinë.