Katër gola, përmbysje emocionesh dhe spektakël në Shkodër! Vllaznia dhe Skënderbeu e nisën edicionin e 88-të të Abissnet Superiore me një përballje që dhuroi gjithçka, por në fund asnjëra skuadër nuk mundi të dalë me tri pikët. Sfida u mbyll me rezultatin 2-2, pas një 90-minutëshi plot raste, gola dhe tension.
Skënderbeu e nisi me më shumë iniciativë, duke rrezikuar disa herë me Nasr, por portieri Avram ishte në gatishmëri. Edhe Vllaznia pati momentet e saj, me Balajn që provoi me kokë pas harkimit të Mustës.
Pas pushimit, ndeshja shpërtheu. Në minutën e 50-të, Bekim Balaj zhbllokoi sfidën për Vllazninë, pas një aksioni ku goditja e Mustës mori devijim. Vetëm dy minuta më vonë, shkodranët fituan një penallti pas ndërhyrjes ndaj Balajt dhe sulmuesi u tregua i saktë nga pika e bardhë, duke çuar vendasit në 2-0.
Por Skënderbeu nuk u dorëzua. Në minutën e 57-të, Janaqi lëshoi një goditje fantastike me të majtën dhe rihapi menjëherë takimin.
Korçarët vazhduan të besonin dhe në minutën e 74-t erdhi edhe barazimi. Bismark përfitoi nga një hapësirë në zonën e Vllaznisë dhe e dërgoi topin në rrjetë për 2-2. Në fund, Dylise u ndëshkua me kartonin e dytë të verdhë, duke lënë Vllazninë me dhjetë lojtarë, por rezultati nuk ndryshoi.