Teuta synon të jetë një nga skuadrat protagoniste në garën për titullin kampion dhe merkatoja e verës tregoi qartë ambiciet e klubit durrsak. Një nga afrimet më të bujshme ishte portieri francez Paul Bernardoni, i cili rezulton të jetë edhe futbollisti më i paguar në kampionatin shqiptar.
Sipas asaj që raporton “Mega Sport”, gardiani francez përfiton plot 20 mijë euro në muaj nga kontrata me Teutën, duke lënë pas të gjithë futbollistët e tjerë të Superiores për sa i përket pagës.
Por Bernardoni kryeson edhe një tjetër klasifikim. Në platformën e specializuar “Transfermarkt”, vlera e tij në treg llogaritet në 1 milion euro, duke e bërë lojtarin më të vlerësuar të kampionatit shqiptar.
Në moshën 29-vjeçare, francezi është kthyer në një pikë të fortë të skuadrës durrsake. Statistikat e konfirmojnë rëndësinë e tij, pasi në 11 javët e para ka pësuar vetëm 5 gola.
Megjithatë, as paraqitjet e tij nuk kanë mjaftuar për të shmangur krizën e rezultateve. Edhe pse ndali një penallti në sfidën kundër Tiranës, Teuta u mposht sërish, duke regjistruar humbjen e tretë radhazi.