Barazimi pa gola ndaj Korabit ka lënë shumë pakënaqësi te Flamurtari, ndërsa trajneri Oltjon Kërnaja ka shpërthyer në akuza të forta pas përfundimit të takimit. Tekniku nuk e fshehu irritimin ndaj arbitrimit nga Silvio Dyrmishi, duke pretenduar se skuadra e tij është dëmtuar nga vendimet e gjyqtarëve.
“Katër lojtarë përfunduan në spital për një helmim, një ndër ta ishte dhe Lushaj. Nuk jam i zhgënjyer sepse shumë vështirë të luash në këtë mënyrë. Nuk e di kush ka përgjegjësi. Shpresoj që këta që vendosin rezultatin e ndeshjes t’ia lejmë fushës, jo arbitrat të vendosin rezultatin e ndeshjes, sepse ka qenë vërtet një tmerr me atë që kam parë. Janë dy penallti, tre raste offside, dhjetë metra, arbitri anësor, jep lojë. Nuk e di. A kanë kanë formimin e duhur, vijnë këtu, por është bërë rrugës, është turp ta them, po është bërë e rrugës.
Kemi gjashtë ndeshje jashtë, gjashtë ndeshje që dominojmë, por nuk na lënë të shënojmë gol. Vetëm këtë kam, s’kam asgjë tjetër të them. Çudia më e madhe është se gabojnë në ndeshjen tonë dhe javën tjetër i shohim në Superligë. Shpresoj të mos i shoh në Superligë këta, se nëse i shohim në Superligë, mbas dy javësh, kur fillon kampionati mbastaj i bie tjetërkush, ndonjë delegate që e bën këtë punë, jo ata të fushës, se si rregull nëse lojtari im gabon unë e nxjerr jashtë, nëse arbitri gabon, duhet të dalë jashtë.”