Lajmet e fundit | Klikoje.al

Tag: Juventus

  • Pirlo: “Messi ka një problem psikologjik, por…”

    Pirlo: “Messi ka një problem psikologjik, por…”

    Lionel Messi nuk ka qenë në formën e tij më të mirë në këtë fillim të sezonit 2020/2021, ndërsa Andrea Pirlo beson se çështja e tij nuk ka të bëjë me aspektin sportiv.

    Trajneri i Juventusit mendon se e gjithë drama që ndodhi në fund të edicionit të kaluar (kur argjentinasi e kërkoi largimin dhe klubi nuk e lejoi), ka ndikuar te kapiteni i Blaugranëve.

    “(Messi) është në një periudhë të veçantë të jetës së tij, jo të karrierës së tij, sepse ka pasur një problem këtë verë. Ka të bëjë me faktin se a do të qëndrojë apo jo te Barcelona”.

    “Mirëpo, gjatë ndeshjeve, gjithmonë i ka treguar vlerat e tij. Më shumë se aspekti i futbollit, ai ka një problem psikologjik, por nuk dua të përfshihem në këtë, sepse nuk ka të bëjë asgjë me ne”.

    “Messi është një fenomen dhe e ka dëshmuar këtë”, ka deklaruar Pirlo në konferencën për shtyp para ndeshjes ndërmjet Barcelonës dhe Juventusit që zhvillohet sonte (e martë) në Camp Nou.

  • 6 vakte dhe 6 dremitje në ditë/ Kështu ylli i Juventusit Cristiano Ronaldo synon rekordin e Iker Kasijasit

    6 vakte dhe 6 dremitje në ditë/ Kështu ylli i Juventusit Cristiano Ronaldo synon rekordin e Iker Kasijasit

    Detajet shpeshherë bëjnë diferencën dhe jo vetëm në fushën e lojës. Është pikërisht kurimi i tyre në radhët e sportistëve të sotëm që ndajnë shpesh një futbollist normal nga kampionët apo edhe jashtëtokësorët e sportit më të bukur në botë.

    Dhe kur bëhet fjalë për faktin e regjimit të një kampioni si Kristiano Ronaldo, pa dyshim që vëmendja bëhet shumë e madhe për të gjithë ata futbollistë të rinj të cilët aspirojnë që një ditë të ecin në gjurmët e yllit portugez të Juventusit, i cili edhe pse 35-vjeçar sot, vazhdon që të jetë në majë dhe çdo sezon është në kërkim të rekordeve të reja. Shpesh Ronaldon e kanë konsideruar edhe si një robot, jo vetëm brenda, por edhe jashtë fushës.

    E ndoshta pikërisht trajtimi që ai i bën trupit të vet në jetën e përditshme është edhe ajo që i ka dhënë këtë jetëgjatësi dhe këtë rendiment iberikasit. Por çfarë e bën regjimin e një futbollisti ideal?

    Në rastin e Kristiano Ronaldos, të ushqyerit dhe gjumi. Pikërisht kështu, nga tavolina e deri te relaksimi mes stërvitjeve të shumta, Nik Litërllhejls zbulon se CR7 konsumon 6 vakte në ditë, por në të njëjtën kohë bën edhe 5-6 seanca dremitjeje, përpara gjumit të mbrëmjes, ku edhe ky nuk duhet të jetë me orë të gjata. Dhe duke përmbushur këto rregulla, Ronaldo, edhe pse me jo pak vite mbi shpatulla, ka një strukturë trupore dhe reaktive në fushë, prej një 20-vjeçari.

    MENYJA E FENOMENIT – Të ushqyerit sot ecën paralelisht me të stërviturit, duke qenë se muskujt kanë nevojë të ushqehen dhe Ronaldo e ka ndarë të ngrënit me 6 seanca. Mëngjesi është me bazë proshutash, djathërash dhe jogurti.

    Ndërkohë, pak orë më pas një tost me avokado mjafton për të pritur drekën, e cila është e ndarë gjithashtu me dy pjesë: vakti i parë është një bazë yndyrash dhe proteinash, përgjithësisht fileto pule dhe sallatë, ndërsa një pjatë e dytë pak minuta më vonë mund të jetë me bazë peshku (më së shumti ton), vezë dhe ullinj. Ndërkohë, edhe pasditja mund të jetë një tjetër tost, ndërsa darka mund të jetë e bollshme, me meny peshku (merluci këshillohet më së shumti) ose bazë mishi.

    DREMITJET SA NJË NDESHJE FUTBOLLI – Por teksa konsumon një sasi të rëndësishme ushqimi, ndonëse duke parë fizikun dhe stërvitjet që bën shpesh ylli i Juventusit, mes tyre nevojitet edhe një relaksim, të cilin Ronaldo e merr falë 5-6 seancave dremitje gjatë ditës, prej 90 minutash secila (sa zgjat një ndeshje futbolli), pas të cilave ai karikon më së miri “bateritë”.

    “Nuk bëhet fjalë për disa dremitje si ato që bëjnë të moshuarit përpara televizorit, por është një regjim i kërkuar dhe i detyruar nga vetë futbollisti”, u shpreh Nik Litërllhejls për “Football Whispers”, eksperti me të cilin Kristiano Ronaldo ka bashkëpunuar për një periudhë shumë të gjatë kohe dhe, me sa duket, ka dhënë rezultate fantastike.

    REKORDI I KASIJASIT – Që Ronaldo është një makineri, kjo dihet tashmë, aq sa edhe në rastin me infektim nga Koronavirusi ai nuk pati asnjë simptomë, përkundrazi vazhdoi të stërvitej në shtëpi normalisht, ndonëse tamponi rezultoi negativ pas 18 ditësh. Gjithsesi, tashmë që juventini është rikthyer, kërkon të rikuperojë periudhën e humbur dhe kërkon tëvazhdojë të shënojë, madje debutimi i tij ndaj Specias dhuroi 2 gola personalë.

    Ndërkohë, kundër Ferencvaroshit Ronaldo bëri debutimin e tij sezonal, i cili përkon me sezonin e 18-të radhazi që luzitani merr pjesë në Ligën e Kampioneve. Në historinë e këtij kompeticioni, vetëm Iker Kasijas ka zbritur në fushë më shumë vite radhazi sesa CR7, konkretisht 20 (nga sezoni 1999- 2000 deri në 2018-2019). Por, duke parë formën që ende sot Kristiano Ronaldo tregon, pa dyshim që të paktën edhe dy vite të tjera në fushën e lojës nuk ia ndalon askush…

    Burimi: PANORAMASPORT.AL

  • Prapaskenat/ Juventusi fiton 3-0 në tavolinë, ja pse e pësoi Napoli

    Prapaskenat/ Juventusi fiton 3-0 në tavolinë, ja pse e pësoi Napoli

    Juventusi fiton kundër Napolit 3-0… në tavolinë. Ashtu siç ishte paralajmëruar gjatë gjithë ditës së shtunë dhe konfirmuar edhe dje, me Ligën e Serisë A që konfirmoi disa herë me radhë dhe i bëri apel Napolit që të udhëtonte drejt Torinos, frenimi që Agjencia Sanitare Lokale (ASL) e krahinës së Kampanias urdhëroi, bëri që Elseid Hysaj me shokë ta paguanin shtrenjtë këtë urdhër, i cili binte ndesh me protokollin e UEFA-s dhe të FIFA-s.

    Ky dokument për anën sportive, detyrimisht i zbatueshëm, ishte firmosur pikësëpari nga Këshilli Teknik Shkencor (CTS), që hartoi planin e pandemisë për Italinë dhe më pas nga kryeministri i vendit, Xhuzepe Konte. Prandaj, me vendimin e marrë nga enti lokal i Kampanias, ndonëse ai shëndetësor, urdhri i tyre shkonte ndesh me vendimet e qeverisë dhe protokollin sportiv, duke bërë që me mosparaqitjen e tyre, skuadra e Napolit të humbë në tavolinë ndeshjen me Juventusin.

    Bardhezinjtë, nga ana e tyre, dje u rreshtuan sipas orarit në terrenin e lojës, në “Allianz Stadium”, së bashku me arbitrat e përzgjedhur për sfidën. Pas pritjes prej 45 minutash, siç e kërkon rregullorja, arbitri ka vërshëllyer fundin dhe automatikisht fitoren e Juves në tavolinë 3-0. Pa dyshim që Napoli do të ketë të drejtën e apelimit, por duke parë edhe reagimet e protagonistëve, duket se ky vendim vështirë se do të kthehet mbrapsht dhe Juventus-Napoli mund të luhet rregullisht në një datë tjetër.

    FLET ANDREA ANJELI

    Pas fitores së Juves në tavolinë, në konferencë për shtyp u paraqit presidenti bardhezi, Andrea Anjeli, i cili foli për situatën e krijuar: “Jam dakord që kjo situatë e krijuar të zbardhet, por në të njëjtën kohë them se kemi një protokoll shumë të qartë, lidhur me rastet kur një futbollist apo më shumë rezultojnë pozitiv me ‘COVID’. Rregullorja flet qartë dhe asnjë ASL (Agjencia Sanitare Lokale) nuk mund të ndërhyjë në mosrespektimin e protokollit.

    Madje, jam i bindur se falë tij do të arrijmë që ta çojmë deri në fund këtë kampionat dhe gjithçka rezervon sezoni futbollistik. Për se zbritëm në fushë? Sepse Juventusi respekton zbatimin e pushtetit dhe ligjit. Juventusi ka zbatuar përpikmërisht protokollin dhe kaq, – shprehet Anjeli, i cili i pyetur nëse ka pasur një bisedë me presidentin e Napolit, Aurelio de Laurentis, pranoi.

    – Po, kam shkëmbyer disa mesazhe me Aurelion dhe i nënvizova se Juventusi, si gjithmonë, u përmbahet rregulloreve. Ai kërkonte që ndeshja të shtyhej, por ne nuk mund të mos aplikonim protokollin. Fitorja 3-0 në tavolinë? Unë pëlqej të fitoj në fushë, gjithmonë. Në disa ndeshje kemi parë se zhvillimi i tyre nuk anulohet, pavarësisht rasteve, ndaj…”, u shpreh numri një i kampionëve.

    LIGA DHA SHEMBUJT

    Për dy ditë me radhë, Liga e Serisë A ka shtyrë Napolin që të paraqitet rregullisht në fushë, për të zbatuar protokollin e firmosur në fillim të këtij sezoni. Madje, gjatë prononcimit të saj zyrtar, Liga u ka kujtuar të kaltërve, por edhe Agjencia Sanitare Lokale (ASL) e krahinës së Kampanias, se po gabonin rëndë, pas pozitivitetit të dy futbollistëve, Zielinski edhe Elmas, duke u dhënë edhe shembujt e fundit:

    “Si rrjedhojë e konfirmimit të dy raste pozitive në skuadrën e Napolit, pavarësisht frenimit që mund të ketë ardhur nga ASL-ja e krahinës, në asnjë germë të justifikimit të tyre nuk përmendet protokolli i Federatës Italiane të Futbollit për zhvillimin e ndeshjeve, duke thyer kështu rregulloren e miratuar nga Këshilli Teknik Shkencor dhe Ministria e Shëndetësisë.

    Prandaj, duke u bazuar në normat specifike, protokolli edhe në rastin e Napolit duhej zbatuar, si për shembull në rastin e skuadrës së Torinos për ndeshjen me Atalantën; të Milanit që duhej të udhëtonte në Krotone; të Xhenoas që luajti në transfertë në ‘San Paolo’ me Napolin, apo edhe të Atalantës sot (dje), në duelin kundër Kaljarit, pas rezultimit të një futbollisti me virus. Protokolli është i detyrueshëm, pasi vetëm kështu mund të garantohet përfundimi i sezonit të Serisë A”.

    DE LAURENTIS

    Pak orë përpara orarit të ndeshjes mes Juventusit dhe Napolit, presidenti i të kaltërve, Aurelio de Laurentis, i dërgoi një letër të hapur Ligës dhe Federatës Italiane për motivet që e shtynë atë dhe skuadrën e tij që të merrte këtë vendim: “Dua të specifikoj se skuadra e Napolit donte të udhëtonte në Torino dhe të luante ndeshjen, pavarësisht rasteve pozitive, por dua të nënvizoj fort se skuadra jonë u frenua nga Agjencia Sanitare Lokale. Prandaj, i bëj thirrje Ligës dhe Federatës që të kuptojnë kërkesën tonë dhe të vendosin që ndeshja me Juven të shtyhet dhe të riluhet në një datë të ardhshme, por kurrsesi të merret vendimi i humbjes sonë në tavolinë 3-0”.

    Burimi: Panorama.al

  • ZYRTARE/ Juventusi gjen menjëherë trajnerin e ri/ Ja kush e merr “timonin”

    ZYRTARE/ Juventusi gjen menjëherë trajnerin e ri/ Ja kush e merr “timonin”

    Juventusi ka gjetur menjëherë trajnerin e ri. Ish-futbollisti legjendar i Milanit dhe Juventusit Andrea Pirlo është emëruar në krye të kampionëve të Italisë.

    “Zonja e Vjetër” konfirmoi në një njoftim të fundit se Pirlo ka firmosur për dy vite.

    Emërimi i 41-vjeçarit në krye të kampionëve të Italisë vjen pas 10 ditësh kur klubi i besoi drejtimin e të rinjve të Juventusit (Juventus U23).

    Pirlo ka realizuar një karrierë fantastike si futbollist. “Profesori” spikati me fanelën e Milanit dhe Juventusit në vitet 2000 duke fituar 6 kampionate italiane dhe 2 Liga të Kampioneve. I njohur për inteligjencën dhe fantazinë e lojës, Pirlo konsiderohet si njëri mesfushorëve më të mirë në historinë e futbollit.

    Kulmi i karrierës së tij erdhi në vitin 2006 kur udhëhoqi Italinë drejt fitores Kupës së Botës për herë të katërt.

  • Juventus në sulm për yllin e Serisë A/ Ofron dy lojtarë në këmbim

    Juventus në sulm për yllin e Serisë A/ Ofron dy lojtarë në këmbim

    Futbollisti i Romës, Nicolo Zaniolo po tërheq vëmendjen e shumë skuadrave. Italiani cilësohet si një ndër talentet më premtues dhe shumë ekipe të mëdha e duan në organikën e tyre.

    Një ndër këto skuadra e interesuar për Zaniolon është edhe Juventusi. Bardhezinjtë e pëlqejnë shumë lojtarin e Romës dhe po provojnë ta transferojnë në Torino. Kampionët e Italisë raportohet se po mendojnë të ofrojnë dy lojtarë në këmbim të Zaniolos. Dy të sakrifikuarit e Juventusit janë, Federiko Bernadeski dhe mbrojtësi Romero. I pari ka zhgënjyer me paraqitjet e tij, ndërsa i dyti është në huazim tek Xhenoa.

    Roma e vlerëson Zaniolon 60 milionë euro dhe ndoshta vetëm dy fubollistët mund të mos mjaftojnë me Juventusin që mund të japë edhe një shumë parash përveç dy lojtarëve.

  • “CR… 50”: S’jetoj për statistika, rëndësi ka vetëm Juvja

    “CR… 50”: S’jetoj për statistika, rëndësi ka vetëm Juvja

    Tridhjetë gola në kampionat dhe 50 në aventurën italiane. Kristiano Ronaldo regjistron një tjetër rekord duke thelluar rrënjët e tij në “Olimpin” e më të mëdhenjve të futbollit. Portugezi është i pari lojtar që arrin të tillë shifër që kur fitorja në Serinë A vlen tri pikë, ose më saktë që nga sezoni 1994- ’95.

    Bën modestin portugezi, që pas ndeshjes deklaroi: “Ishte një ndeshje shumë e vështirë ndaj një skuadre që ka bërë një kampionat të shkëlqyer. Ishte një shans i mirë dhe ditëm të përfitojmë, ndaj edhe jam shumë i kënaqur për mënyrën se si luajtëm e disi më tepër për rezultatin e arritur”.

    HISTORIK – Rekordet janë buka e tij e përditshme dhe Ronaldo i ka përdorur gjithmonë për të rritur nivelin e tij. Kampion që nuk ndryshket kurrë e përveç trofeve vazhdon të vendosë primatë të cilat kushdo që të vijë pas tij, do ta ketë të vështirë t’i tejkalojë. “Rekordet kanë shumë rëndësi dhe unë jam gjithnjë gati për t’i ndjekur. Nuk janë fiksimi im dhe ato kanë ardhur natyrshëm gjatë karrierës sime. Nuk kam menduar kurrë për golat apo rekord, sepse synimi im parësor është që të ndihmoj skuadrën që të arrijë fitore dhe trofe”, deklaroi Ronaldo pas ndeshjes së djeshme për mikrofonat e “SKY”.

    CHAMPIONS DHE DEL PIERO – Në deklaratën e portugezit nuk mund të mungonte edhe një koment në lidhje me Ligën e Kampioneve, edhe pse për titullin në Serinë A i mungon matematika. Megjithatë, nga lartësia e përvojës së tij, CR7 sugjeron: “Në fillim duhet të mendojmë se si të përmirësohemi. Kampionati nuk është mbyllur dhe duhet të fitojmë dy ndeshjet e mbetura. Sot ishte një sfidë e rëndësishme dhe arritëm të fitonim ndaj një skuadre që luan mirë. Të njëjtën gjë duhet të bëjmë në sfidat në vijim e më pas edhe në Champions”.

    Një legjendë e gjallë e Juventusit përballë një tjetre që ka shkruar historinë me bardhezinjtë. Portugezi merr edhe bekimin e Alesandro Del Pieros që e “sheh” si të përkushtuar më shumë te sukseset e “Zonjës” sesa te rekordet personale. Duke analizuar fitoren e djeshme dhe sidomos paraqitjen e numrit 7, “Pinturikio” deklaroi: “Ronaldo është fokusuar shumë te Juventusi dhe te roli që ka në skuadër. Bën gola, është gjithnjë gati për të ndihmuar dhe përbën një prezencë konstante dhe të sigurt për shokët. Nuk mendon më vetëm për vete, por për të qenë në formën më të mirë në ndeshjet e Champions-it, duhen disa përmirësime”.

  • Shënoi dje kundër Bolonjës, Kristiano Ronaldo thyen rekord në Serinë A

    Kristiano Ronaldo shndërroi në gol një penallti në ndeshjen e djeshme kundër Bolonjës. Sulmuesi i Juventusit ishte kritikuar shumë gjatë dy ndeshjeve të fundit në Kupën e Italisë dhe vendosi ti përgjigjej kritikëve me gol dhe rekord.

    Po po mirë e dëgjuat rekord, pasi Ronaldo me golin dje kundër Bolonjas u bë golashënuesi portugez më i mirë në Seria A. Ish-lojtari i Real Madrid kaloi Rui Kostan duke u bërë futbollisti portugez me më shumë gola të shënuar në Seria A.

    Ronaldos iu deshën vetëm dy sezone për të thyer rekordin e Rui Kostas me këtë të fundit që ka luajtur 8 vite në Seria A me Fiorentinën dhe Milanin gjatë viteve 1994-2006. Goli i djeshëm për Kristiano Ronaldon ishte i 22-ti këtë sezon në Seria A, një më shumë sesa sezoni i kaluar ku shënoi 21 gola me fanellën e Juventusit.

    Sulmuesi 5 herë fitues i Topit të Artë ka realizuar deri tani 43 gola në kampionatin italian duke u bërë golashënuesi më i mirë portugez në Seria A.