Egnatia ka siguruar një tjetër barazim në fazën në grup të Ligës së Konferencës. Skuadra rrogozhinase ndaloi 1-1 në transfertë ndaj Arhus të Danimarkës, në ndeshjen e dytë të fazës së grupeve, duke e shtuar në xhep një pikë të re pas barazimit të një jave më parë ndaj Midtjylland.
Ndeshja nisi me ngjarje që në minutën e 3-të. Kahl, mbrojtësi i vendasve, ndaloi në mënyrë të parregullt Grudën që kishte nisur drejt portës dhe u ndëshkua me karton të kuq. Danezët mbetën me dhjetë lojtarë që në fillim.Egnatia e shfrytëzoi epërsinë numerike në minutën e 13-të. Pas një kundërsulmi perfekt, Adjesa nisi Grudën, ndërsa sulmuesi nuk gaboi para portës dhe e solli Egnatinë përpara.
Pjesa e dytë nisi keq për të ftuarit. Në minutën e 49-të, pas një zbritjeje të shpejtë, Bogere, që kishte hyrë në fushë në startin e pjesës së dytë, rivendosi barazimin për Arhus. Edhe pse luajti me një më shumë për pothuajse gjithë ndeshjen, Egnatia nuk arriti ta gjente golin e dytë dhe ndeshja u mbyll 1-1. Për Egnatinë është një pikë e vlefshme në transfertë, por me siguri edhe një ndjesi mosshfrytëzimi, duke pasur parasysh avantazhin numerik që nga fillimi.