Ish-portieri i Partizanit, Perlat Musta, rikthen në vëmendje peshën historike të derbit të kryeqytetit, duke theksuar se të dyja skuadrat kanë dhënë shumë për futbollin shqiptar. Në intervistën e tij për RTSH Sport, ai nënvizon gjithashtu se trajnerëve të rinj u duhet kohë për të ndërtuar ekipet e tyre, por për një gjë është i bindur: derbi ka emocionet e veta, pavarësisht momentit që kalojnë skuadrat.
“Në kohen tonë, vendi i parë dhe Kupa ishte objektivi, ashtu si edhe për Tiranën. Bukuria e futbollit shqiptar në vite, në dekada, ka qenë derbi Partizani-Tirana, sepse dy ekipet kanë dhënë shumë për futbollin shqiptar. Derbi gjithmonë e ka peshën, pavarësisht momenteve të caktuara, do thoja siç është tani, për shembull, sepse gjendja, e dyja ekipet, në fillim kampionati, i ka bërë tifozët mos afrohen në stadium.
Ashtu siç kur ato janë mirë, i keni parë, në çdo kohë, në çdo periudhë ka qenë stadiumet të mbushura plot. Partizani ka një trajner të ri, po ashtu dhe Tirana. Është e vështirë që, se ti që ka e lehtë përshtatja, të gjithë ekipet do ishin bërë për dy-tre javë. Prandaj duhet kohë, vite, domethënë për të bërë një ekip që dhe ekipet të mësojnë filozofinë e trajnerit dhe trajneri të njohë lojtarët. Derbi gjithmonë e ka karikimin brenda. Në qoftë se thuhet që ndez në të thatë, derbi ndez dhe në të njomë.” Përfundoi Perlat Musta.