Kategoria e Parë pritet të pësojë ndryshime të mëdha në sezonin 2026-2027, si pasojë e zgjerimit të Superiores dhe ristrukturimit të futbollit shqiptar.
Sipas propozimit të parë që po diskutohet, dy skuadrat e renditura në vendet e para do të sigurojnë automatikisht ngjitjen në elitë. Ndërkohë, ekipet e vendit të tretë dhe të katërt do të përballen në një finale mes tyre për një vend në Superiore. Humbësi i kësaj sfide, së bashku me skuadrat e renditura në vendet e pesta dhe të gjashta, do të futen në një fazë shtesë play-off-i, ku në lojë do të jetë edhe skuadra e vendit të nëntë të Superiores.
Një tjetër variant që po shqyrtohet është ruajtja e formulës së sezonit të kaluar. Në këtë rast, dy ekipet e para do të ngjiten direkt, ndërsa fituesi i play-off-it të Kategorisë së Parë do të sigurojë gjithashtu biletën për në elitë. Humbësi i finales së play-off-it do të luajë më pas një ndeshje vendimtare ndaj vendit të nëntë të Superiores.
Diskutimet pritet të vijojnë edhe në ditët e ardhshme, por ajo që duket e sigurt është se Kategoria e Parë do të përballet me një transformim të rëndësishëm. Ndryshimet mund të prekin jo vetëm ngjitjet drejt Superiores, por edhe skemën e rënieve dhe promovimeve mes Kategorisë së Parë dhe të Dytë.