U përfol për një rikthim te Partizani, Egzon Belica merr vendimin final

22

Egzon Belica ka vendosur të vijojë karrierën në elitën e futbollit të Maqedonisë së Veriut. Mbrojtësi me përvojë ka arritur marrëveshje me Strugën, ku do të vihet nën urdhrat e trajnerit Bledi Shkëmbi për sezonin e ri.

Për 35-vjeçarin kjo do të jetë hera e parë që vesh fanellën e klubit nga qyteti i tij i lindjes. Pas aventurës te Rabotniçki në pjesën e dytë të sezonit të kaluar, Belica ka zgjedhur një sfidë të re, ndërsa zyrtarizimi pritet së shpejti.

Në Shqipëri, Belica mbahet mend për periudhën e suksesshme te Partizani, ku zhvilloi 178 ndeshje zyrtare dhe mbajti edhe shiritin e kapitenit, duke u kthyer në një nga mbrojtësit më të vlerësuar të klubit.

Karriera e tij ka kaluar gjithashtu nga Besa, Shkëndija, Prishtina, Riga, Inter Turku, Konkordia dhe Ohrid Lihnidos, duke ndërtuar një eksperiencë të gjatë në futbollin rajonal dhe atë europian.