Egnatia dhe Lillestrom ndahen në paqe në “Arena Egnatia”, me sfidën e parë të Play-Offit të Europa League që përfundon në barazim pa gola. Rrogozhinasit nuk arritën të marrin avantazhin e dëshiruar në shtëpi, por ruajtën portën të paprekur dhe tashmë gjithçka do të vendoset në ndeshjen e kthimit në Norvegji javën e ardhshme.
Takimi nisi me një moment alarmi për vendasit. Në minutën e 5-të, Lillestrom gjeti rrjetën me Gabrielsen, i cili pas një goditjeje dënimi goditi saktë me kokë dhe mposhti Dajsinanin. Megjithatë, festa norvegjeze zgjati pak, pasi ndërhyrja e VAR-it anuloi golin për pozicion jashtë loje.
Egnatia reagoi dhe gradualisht nisi të afrohej më shumë drejt portës kundërshtare. Në minutën e 25-të, Adjesa provoi nga krahu i majtë pas një rivënie anësore, por gjuajtja e tij u ndal nga portieri i Lillestrom.Pesë minuta më vonë, sërish Adjesa ishte protagonist. Sulmuesi krijoi hapësirë në të majtë dhe tentoi me një devijim që përfundoi në duart e portierit norvegjez.
Rrogozhinasit patën një tjetër mundësi të mirë në minutën e 40-të, kur Albaneze mori përsipër një aksion nga krahu i djathtë dhe goditi drejt portës, por topi përfundoi mbi traversë.
Një rezultat që e lë gjithçka të hapur. Egnatia nuk mori fitoren që do ta kishte afruar ndjeshëm me kualifikimin, por as nuk pësoi gol në shtëpi. Tashmë vëmendja zhvendoset në Norvegji, ku javën e ardhshme do të luhet ndeshja e kthimit dhe do të përcaktohet skuadra që do të vazhdojë rrugëtimin në Europa League.