Category: Receta

Në këtë artikull, klikoje.info ju njeh me një recetë fare të thjeshtë, por shumë të shijshme dhe të shëndetshme, ajo është receta e kekut me banane.

Shumica e recetave të kekut me banane, kërkojnë dyfishin e sasisë së gjalpit që është përdorur në këtë recetë.

Por për ta mbajtur kekun të njomë dhe për të ruajtur shijen e frutave, duhet të reduktoni sasnë e gjalpit, të shtoni një banane dhe pak kos.

Përbërësit

• 4 banane shumë të pjekura, të qëruara dhe të shtypura (rreth 2 gota)
• 1⁄2 filxhan kos
• 4 lugë gjelle, gjalpë i shkrirë
• 2 vezë
• 1 lugë çaji vanilje
• 2 gota miell
• 3⁄4 filxhan sheqer
• 1⁄2 filxhan arra të copëtuara
• 1 lugë sodë buke
• 1 tsp pluhur pjekës
• 1⁄2 lugë kanellë të bluar
• 1⁄2 lugë kripë

 Përgatitja

Fillimisht, ngroheni furrën në 180° C.

Në një enë të madhe shtoni bananet, kosin, gjalpin, vezët, vaniljen dhe përziejini së bashku.

Në një enë tjetër, shtoni dhe përzieni miellin, sheqerin, arrat, sodën e bukës, pluhurin pjekës, kanellën dhe kripën.

Më pas, shtoni përbërësit e thatë në enën ku keni përgatitur bananet dhe përbërësit e tjerë, trazojini mirë derisa të bashkohen plotësisht.

Në një tavë për pjeke, përhapni gjalpin dhe më pas vendosni në të masën e përgatitur.

Vendoseni tavën në telin më të ulët të furrës dhe lëreni të piqet për rreth 50 minuta. Për të parë nëse është pjekur plotësisht, provoni të shponi sipërfaqen e kekut me një kruajtëse dhëmbësh. Nëse ajo del e pastër tregon që buka është gati, nëse jo atëhere lëreni të piqet edhe pak.

Kur të jetë gati, lëreni kekun të ftohet për 5 minuta.

Ju mund ta konsumoni atë të ngrohtë ose në temperaturë dhome.

Këshillë

Ju mund t’i shtoni këtij keku shumë përbërës të tjerë, në mënyrë që ai të bëhet edhe më i shëndetshëm.

Për këtë mjafton të shtoni në recetën e më sipërme edhe këto përbërës:

1 filxhan boronicë, të freskët ose të ngrirë

1⁄4 filxhan are kokosi të copëtuar

2 lugë gjalpë të butë kikiriku

Buka e përgatitur në shtëpi nuk ka të krahasuar me asgjë tjetër.

Në këtë mënyrë jeni ju që kontrolloni cilësinë e përbërësve me të cilët përgatitet ajo.

Receta e sotme nuk tregon hapat e përgatitjes së bukës klasike, por të një lloji tjetër që premton shumë shije.

Nga njëra anë kosi i jep butësinë perfekte si tulit por dhe kores së bukës, e ndërsa dy llojet e djathit i japin shijen dhe aromën marramendëse.

Lexoni të gjitha hapat që ju duhen dhe përgatiteni që sot këtë recetë të mrekullueshme.

Përbërësit

• 3 gota uji miell i situr
• 150 g gjalpë i shkrirë (për një recetë sa më të shëndetshme mund të përdorni vaj ulliri)
• 1 gotë uji me djathë të bardhë
• 1 gotë uji me djathë kaçkavall
• 2 vezë
• 3-4 lugë gjelle salcë kosi
• 3-4 lugë gjelle kos
• 1 lugë çaji sodë buke
• 1 lugë çaji kripë
• 1 lugë çaji fryrës

Përgatitja

Si fillim ndizni furrën në 200 gradë.

Ndërkohë merrni një formë keku dhe lyejeni me pak vaj ulliri.

Në një tas përzieni miellin, sodën e bukës, kripën dhe fryrësin me ndihmën e një piruni.

Ndërsa në një tas tjetër rrihni vezët, kosin, salcën e kosit.

Ju sugjerojmë që të përdorni telin e kuzhinës për të patur një rezultat sa më të mirë.

Do ta shihni që masa e krijuar është kremoze dhe e plotë.

Këtë salcë hidheni në mes të miellit bashkë me gjalpin e shkrirë dhe nisni ta punoni që përbërësit të lidhen.

Tani është koha që të shtoni dy llojet e djathit, që i japin dhe shijen e veçantë kësaj recete.

Përzjejeni mirë derisa të keni formuar një brumë të hollë afërsisht si të kekut klasik.

Ju sugjerojmë që ta kaloni tek forma e kekut që lyet në fillim me gjalpë dhe përhapeni mirë me një spatul.

Futeni për ta pjekur për 50-55 minuta, ose derisa sipërfaqja e thikës me të cilën shponi bukën të dalë e pastër.

Kur të jetë pjekur, lëreni të ftohet për 10 minuta para se ta ndani me të dashurit tuaj.

Kjo mund të jetë ëmbëlsira më e lehtë për t’u përgatitur, e cila mund t’iu shpëtojë kur duhet të gjeni një zgjidhje të shpejtë.

Në ndryshim nga kremi klasik i zupave, kremi i përgatitur me qumësht dhe pana është akoma edhe më i butë.

Duke e shndërruar ëmbëlsirën tuaj të preferuar, në një shije krejtësisht të re.

Klikoje.al ju tregon sekretin që ruan kjo recetë e thjeshtë dhe mahnitëse.

Përbërësit

• 250 ml qumësht
• 25g miell
• 75 g sheqer
• 180 ml pana
• 20g sheqer pluhur
• 3 të verdha vezësh
• 1 paketë me vanilje
• 1 pako biskota të gatshme të thjeshta

Përgatitja e kremit

Vendosni qumështin për t’u ngrohur dhe hidhni në tenxhere edhe vaniljen.

Ndërkohë në një tas të madh rrihni të verdhat e vezëve me sheqerin derisa të shkrihen kokrrizat e tij.

Shtoni aty edhe miellin dhe përsëri përzjejeni që të mos krijohen kokrriza.

Hidhni qumështin e ngrohur tek tasi me përzierjen dhe rriheni me telin e kuzhinës.

Kalojeni përzierjen në tenxhere dhe vendoseni në zjarr duke e përzierë derisa të mpikset.

Kur kremi të jetë mpiksur kalojeni  në një tas në mënyrë që të ftohet.

Ju këshillojmë që të prisni derisa kremi të jetë ftohur plotësisht përpara se të vazhdoni.

Ndërkohë në një tas tjetër rrihni panën me sheqerin pluhur.

Përzjejini të dy llojet e kremrave derisa të përfitoni një masë homogjene dhe të plotë.

Përgatitja e ëmbëlsirave

Merrni disa tasa të vegjël apo gota dhe në fund hidhni pak nga kremi i përgatitur.

Më pas shtoni një shtresë me biskota të thërrmuara.

Përsërisni këta hapa derisa në fund të keni përfunduar me një shtresë kremi.

Nëse dëshironi biskotat e thërrmuara mund t’i përzieni me lëkurën e grirë të një portokalli për një shije akoma dhe më të freskët.

Futni në frigorifer për 20-30 minuta para se t’i servirni.

Duke qenë se përgatitet në tasa apo gota, secili prej familjarëve do të ketë një sasi perfekte për të shijuar.

Nëse doni një alternativë ndryshe për recetën tuaj të drekës. Provoni të përgatisni recetën e musakasë me patate të ziera.

Një recetë me shije të mrekulleshme e sjellë nga amvisa Suela Katanja.

PËRBËRËSIT 

• 600 gr mish i grirë
• 1 kg patate të reja
• 2 vezë
• 2 qepë
• vaj, kripë, piper

PËRGATITJA

Qepët e prera imët i fërgoni me pak yndyrë, më pas shtoni mishin e grirë dhe i fërgoni edhe 10-15 minuta, në fund shtoni piper të kuq dhe të zi, sipas dëshirës.

Në një tjetër enë ziejm patatet e pastruara mirë, kur të jenë gati i qërojmë dhe i presim me rradhë.

Në tepsi ose tavë renditini me rradhë një rend patate dhe një rend mish derisa të kryhet e tërë sasia.

Futeni në furrë të nxehtë, ngadalsojeni temperaturën dhe pas 20-30 minuta para se të jetë kryer pjekja tundni dy vezë me pak qumësht dhe ja hidhni sipër. Tepsinë e mbani në furrë edhe rreth 5 minuta.

Omleta është gjithmonë zgjedhja e duhur për një mëngjes të shëndetshëm.

Në ka një gatim që qendron në krye të recetave për një mëngjes të shijshëm, plot vlera ushqyese e të shëndetshme pa asnjë dyshim ato janë omletat.

Të kombinuara me perime të ndryshme, të miksuara apo thjeshtë me një prej tyre, spinaq a brokoli, lulelakër a patate, omletat, përbërësi kryesor i të cilave janë vezët përbëjnë një mënyrë ideale për të nisur ditën shëndetshëm.

Një mënyrë fantastike për të mbajtur trupin dhe organizmin në formë, për të nisur ditën mbarë me energji.

Recetat e këtij gatimi të thjeshtë janë të shumëllojshme.

Përbërësit

• 500 gr kungulleshka
• 6 vezë
• 80 gr djathë i bardhë i thërrmuar
• 2 lugë gjelle me majdanoz të grirë
• 2 lugë gjelle vaj ulliri
• Kripë
• Piper i zi

Përgatitja

Pasi t’i keni larë me ujë të bollshëm kungulleshkat, ju sugjerojmë t’i prisni në feta sa më të holla.

Më pas vendosini në një letër kuzhine, në mënyrë që të përthithet lagështira që ato kanë.

Në një tas përzieni vezët, djathin e thërrmuar dhe majdanozin. Më pas i shtoni kripën dhe piperin sipas dëshirës.

Vendosni tiganin në zjarr të lartë, dhe hidhni aty vajin e ullirit.

Si fillim shtoni fetat e kungulleshkave, dhe kthejini herë pas here që të marrin një ngjyrë neutrale.

Ky proces mund të zgjasë rreth 6-8 minuta në varësi të trashësisë së fetave të kungulleshkave.

Kur kungulleshkat të jenë gati, hidhni përzierjen e vezëve.

Sigurohuni që përzierja të përhapet në të gjithë sipërfaqen e tiganit dhe të kenë mbuluar kungulleshkat.

Lëreni në zjarr deri sa veza të ketë filluar mpiksjen.

Në këtë moment, ulni temperaturën e nxehtësisë dhe të mbuloni tiganin me një kapak për 10 minuta.

Hiqeni nga zjarri tiganin dhe kthejeni me kujdes në një pjatë.

Kjo omletë është e përshtatshme për katër persona.

Antipastat përbëjnë paralojën e një vakti të rëndësishëm.

Një antipastë e mirë dhe e shijshme përmirëson humorin dhe nxit ekzaltimin për pjatat e tjera të vaktit.

Funksioni i një antipaste është jo vetëm të nxisë urinë por edhe kënaqë shqisat dhe t’i parapërgatisë ato për kënaqësi të mëtejshme gjatë ushqyerjes.

Recetat e antipastave janë të larmishme, të pasura dhe intriguese.

Një prej tyre është ajo me gjizë të pjekur me barishtet e qepëve dhe limon.

Kjo pjatë e ngrohtë përgatitet shumë lehtë.

Mjaftojnë pesë minuta për të përgatitur gjizën me barishtet e qepëve dhe për ta vendosur në furrë.

Në disa raste, në përgatitjen e gjizës përfshihet edhe veza e cila i jep antipastës një fryrje të lehtë dhe paraqitje të sfungjertë, por sipas dëshirës atë edhe mund ta shmangni.

Në këtë recetë, do të mësoni si ta përgatisni antipastën vetëm me hudhër, barishte, limon dhe gjizë.

Përbërësit:

• 2 filxhanë me gjizë
• 1 limon i shtrydhur
• Lëkura e grirë hollë e një limoni
• 2 thelbinj hudhre të grirë hollë
• Gjysëm filxhani me barishte qepe të prera hollë.
• Piper i zi pluhur
• Vaj ulliri ekstra i virgjër
• Feta buke të thekura

Përgatitja:

Ndizeni furrën në 190 °C.

Merrni një tepsi të vogël ose enë qelqi për pjekjeje dhe lyejeni me pak yndyrë.

Në një enë tjetër, përzieni gjizën, lëngun e limonit dhe lëkurën e tij, hudhrën, barishtet, kripë dhe shumë piper.

Pasi ta keni përzier mirë, hidheni në enën e pjekjes dhe spërkateni me vaj ulliri.

Sipas dëshirës ju mund ta fusni në frigorifer dhe ta piqni të nesërmen.

Në të kundërt, futeni enën në furrë dhe piqeni për 15-20 minuta.

Pasi të nxirrni nga furra, gjizën e pjekur mund ta spërkasni me vaj ulliri sërish.

Këtë antipastë të ngrohtë duhet ta servirni menjëherë pas daljes nga furra.

Ajo shoqërohet me bukë të thekur e krokante ose biskota të kripura.