Besëlidhja ka bërë një tjetër lëvizje të rëndësishme në merkato, duke zyrtarizuar afrimin e sulmuesit Festim Alidema. 28-vjeçari do të jetë pjesë e skuadrës lezhjane për sezonin e ri, duke shtuar alternativat në repartin ofensiv.
Alidema vjen me një eksperiencë të konsiderueshme në futbollin shqiptar dhe atë të Kosovës. Karrierën e nisi te Llapi në Kosovë, ndërsa më pas provoi aventurën në Kroaci, ku luajti për Slaven Belupon dhe Dragovoljac.
Sulmuesi u rikthye më pas në Kosovë, duke veshur fanellat e Dritës dhe Lirisë së Prizrenit. Në Shqipëri, ai u aktivizua me Erzenin në Superiore, përpara se të kalonte te Pogradeci, ku spikati me paraqitjet e tij dhe la gjurmë në dy sezone më parë.
Së fundmi, Alidema ishte pjesë e Ballkanit në Superligën e Kosovës. Tashmë ai rikthehet në Shqipëri për të nisur një kapitull të ri me Besëlidhjen.
Afrimi i tij konsiderohet një përforcim me peshë për lezhjanët, të cilët synojnë të kenë një skuadër sa më konkurruese në sezonin e ri. Me eksperiencën dhe golat e tij, Alidema pritet të jetë një nga alternativat kryesore të Besëlidhjes në sulm.