Partizani e mbylli sezonin 2025-2026 pa Europë. Në stolin e kuq u pa sërish një trajner që aktivizoi të rinjtë, me Ralf Zhivanajn që ndoqi të njëjtën linjë si Skënder Gega një vit më parë. Por ndryshe nga atmosfera optimiste e fundsezonit të kaluar, këtë herë në kampin e kuq mbizotëron ftohtësia dhe pasiguria. Mungesa në kupat e Europës pritet të sjellë pasoja financiare, ndërsa klubi po përgatitet për një verë me ndryshime të mëdha.
Organika shihet e mbingarkuar dhe disa lojtarë pritet të largohen. Emra si Sidibe, Human dhe Doumbia kanë oferta konkrete, çka mund të ndihmojë financat e klubit në mungesë të të ardhurave europiane. Megjithatë, vendimi përfundimtar për të ardhmen e tyre pritet të lidhet ngushtë me trajnerin e ri.
Në ambientin pranë klubit kanë nisur të qarkullojnë emrat e parë për pankinën, edhe pse ende nuk ka asgjë zyrtare. Tendenca duket qartë: Partizani po sheh sërish drejt tregut të huaj, me profilin kroat ose serb që mbetet më i preferuari. Kujtojmë se sezonin e kaluar të kuqtë e nisën me serbin Mladen Milenkoviç, i cili më pas u largua për t’ia lënë vendin Oltion Kërnajës.