Goditje e rëndë për Partizanin në prag të sezonit të ri. Tedi Malaj do të qëndrojë për disa muaj jashtë fushave, pasi dëmtimi i pësuar gjatë fazës përgatitore e ka detyruar mesfushorin 19-vjeçar t’i nënshtrohet ndërhyrjes kirurgjikale.
Malaj, i cili në sezonet e fundit ka qenë vazhdimisht pranë ekipit të parë dhe shihet si një prej talenteve të së ardhmes te të kuqtë, u dëmtua në miqësoren ndaj Skënderbeut. Ekzaminimet zbuluan dëmtimin e ligamentit të kryqëzuar anterior, duke bërë të nevojshëm operacionin.
Klubi i Partizanit ka bërë të ditur se ndërhyrja është kryer me sukses nga prof. dr. Saša Janković. Tashmë, për mesfushorin nis një tjetër fazë, ajo e rikuperimit, e cila do të zhvillohet sipas një programi të detajuar të përgatitur nga stafi mjekësor i klubit.
Mungesa e Malajt është një lajm aspak i mirë për trajnerin Bratu, i cili humbet një alternativë të vlefshme në repartin e mesfushës për pjesën e parë të sezonit. Tani, talenti 19-vjeçar do të fokusohet te rikuperimi, me objektivin për t’u rikthyer sa më shpejt në fushën e lojës.