Pas barazimit 1-1 ndaj Dinamos, trajneri i Aluminij, Jura Arsiç, vlerësoi nivelin e kundërshtarit, duke e cilësuar ekipin shqiptar si një rival të fortë dhe cilësor. Sipas teknikut slloven, goli i pësuar ishte pasojë e një gabimi individual.
Jura Arsiç u ndal edhe te karakteri i futbollistëve të tij, duke theksuar se reagimi i skuadrës u shpërblye me golin e barazimit. Ai beson se para ndeshjes së kthimit, Aluminij duhet të ruajë të njëjtin mentalitet dhe të shfrytëzojë mësimet e marra nga minuta e fundit e sfidës.
Kishim një ndeshje shumë të vështirë, Dinamo tregoi se është një kundërshtar shumë cilësor. Por ne e dinim dhe e parashikonim. Fatkeqësisht, bëmë një gabim individual, i cili nuk ishte vendimtar ose, për fat të mirë, jo fatal. Në pjesën e dytë, treguam shumë më tepër në fazën sulmuese dhe gjithashtu rregulluam fazën mbrojtëse deri në detajet e fundit, pasi i lejuam kundërshtarit vetëm një ose dy raste.
Djemtë treguan karakter, ishin të patrembur dhe u shpërblyen me një gol. Kjo është rruga e duhur. Patëm një mundësi të mirë për t’i analizuar ato dhe mbi të gjitha, për të gjetur brenda vetes atë që bëmë në 30 minutat e fundit dhe për të avancuar në raundin tjetër me zgjuarsi, konkurrencë dhe mbi të gjitha me qetësi.