Humbja në derbin ndaj Tiranës ka shkaktuar pakënaqësi të mëdha te tifozët e Partizanit. Pas disfatës 1-3 përballë rivalëve historikë, faqja zyrtare e klubit të kuq është mbushur me komente negative, ku përveç kritikave për paraqitjen e skuadrës, një pjesë e tifozëve kërkon edhe shkarkimin e trajnerit Florin Bratu. Një humbje në derbi nuk është kurrë e lehtë për t’u kapërdirë, por mënyra se si erdhi disfata ka shtuar edhe më shumë pakënaqësitë në kampin e kuq. Partizani arriti të barazonte rezultatin me Himallarin pas golit të Xhixhës, por në pjesën e dytë Tirana goditi dy herë të tjera, me Ilievskin dhe Kishin, duke marrë një fitore që ka lënë shije të hidhur te tifozët e kuq.
Në rrjetet sociale, reagimet nuk kanë munguar. Përveç zhgënjimit për humbjen ndaj rivalëve të kryeqytetit, një pjesë e mbështetësve kanë drejtuar gishtin nga pankina, duke vënë në diskutim vazhdimësinë e Florin Bratut në krye të skuadrës. Kërkesa për largimin e trajnerit është kthyer në një nga temat kryesore të komenteve pas përfundimit të derbit. Shifrat e javëve të para nuk e ndihmojnë teknikun rumun. Në gjashtë javët e para të kampionatit, Partizani ka arritur të regjistrojë vetëm një fitore, një bilanc që ka shtuar shqetësimin për ecurinë e skuadrës dhe pritshmëritë e saj në këtë sezon.
Tashmë, presioni mbi Bratun është shtuar ndjeshëm, ndërsa Partizani duhet të gjejë sa më shpejt rrugën e rezultateve pozitive. Për tifozët, derbi është shumë më tepër sesa një ndeshje e zakonshme dhe humbja ndaj Tiranës ka lënë pasoja në humorin e tyre. Mbetet për t’u parë se si do të reagojë klubi pas kësaj disfate dhe nëse drejtuesit do të vazhdojnë t’i besojnë projektit të nisur me Bratun. Për momentin, një gjë është e qartë: pas humbjes në derbi, pakënaqësia e tifozëve të Partizanit është bërë e dukshme, ndërsa pankina e trajnerit rumun është vënë në qendër të debatit.