“Do të jemi kampionë!” Bratu lëshon sfidën që në prezantim, trajneri rumun: Dua të ndërtoj diçka speciale

6

Florin Bratu, është prezantuar zyrtarisht në krye të stolit të të kuqve, duke nisur menjëherë punën me skuadrën. Pas takimit me drejtuesit dhe futbollistët në ambientet e klubit, tekniku rumun zhvilloi edhe seancën e parë stërvitore së bashku me stafin e tij në “Shtëpinë e Futbollit”.

Në fjalën e tij të parë si trajner i Partizanit, Bratu falënderoi presidentin, drejtuesit e klubit dhe tifozët për besimin e dhënë, ndërsa u shpreh krenar që do të drejtojë një nga klubet më të rëndësishme të futbollit shqiptar.

46-vjeçari theksoi se vjen me përvojë dhe ambicie për të ndërtuar një skuadër konkurruese, duke pranuar se e pret një sfidë e vështirë për shkak të pritshmërive të larta që ka klubi.

“Së pari përshëndetje të gjithëve. Falënderoj presidentin, të gjithë bordin dhe një përshëndetje të veçante për tifozët e Partizanit. Jam krenar që jam këtu dhe i lumtur sepse Partizani është nga klubet më të mëdha të futbollit shqiptar.

Kam ardhur këtu me shumë eksperiencë, dua të ndërtoj diçka speciale me këtë skuadër. E di shumë mirë që nuk do të jetë e lehtë se është klub ku të gjithë kërkojnë rezultate më të mira. Unë do të jap maksimumin që në fund të këtij sezoni të jemi kampionë”, ishin fjalët e trajnerit në prezantimin e tij.