Cagliari ka vendosur sytë te Armando Broja për të përforcuar repartin ofensiv në prag të sezonit të ri. Sipas gazetarit Gianluca di Marzio, sulmuesi i Kombëtares shqiptare është një nga emrat që po vlerësohet nga drejtuesit e klubit sard për të rritur cilësinë në sulm.
24-vjeçari, i cili është në pronësi të Burnleyt, mbetet një profil shumë i vlerësuar në tregun europian pavarësisht se vitet e fundit është penalizuar nga dëmtimet. Broja ka kaluar më parë edhe te Chelsea, ndërsa në të shkuarën ka qenë në radarët e Milanit, që e kishte ndjekur me interes për një transferim të mundshëm.
Sezoni i fundit në Premier League nuk ishte ndër më të lehtët për sulmuesin shqiptar. Ai regjistroi 24 paraqitje, duke kontribuar me 1 gol dhe 1 asist, ndërsa shpesh u detyrua të luftonte për të gjetur vazhdimësi dhe minutazh. Megjithatë, potenciali dhe cilësitë e tij fizike vazhdojnë ta bëjnë një nga sulmuesit më interesantë të brezit të tij.
Kalimi te Cagliari mund të përfaqësojë një mundësi ideale për Brojën që të rigjejë formën më të mirë dhe të ketë një rol më të rëndësishëm në ekip.