Ardit Deliu nuk do të jetë më pjesë e Ballkanit të Suharekës. Mesfushori shqiptar ka mbyllur bashkëpunimin me klubin kosovar, pas një sezoni të kaluar në Superligën e Kosovës. Deliu, i cili në të kaluarën ka veshur fanellat e Tiranës dhe Vllaznisë në elitën e futbollit shqiptar, iu bashkua Ballkanit për të provuar për herë të parë eksperiencën jashtë Shqipërisë.
Aventura e tij në Kosovë zgjati vetëm një vit, ndërsa ndarja vjen në një moment kur Ballkani sapo është eliminuar në turin e dytë të Conference League.
Tashmë, mesfushori 27-vjeçar bëhet një emër interesant në tregun e transferimeve. Eksperienca e tij në Superiore dhe Superligën e Kosovës e bëjnë Deliun një okazion për klubet që kërkojnë përforcime në mesfushë.
Mbetet për t’u parë se ku do të vijojë karrierën ish-lojtari i Tiranës dhe Vllaznisë, me merkato që mund t’i rezervojë një tjetër aventurë në ditët në vijim.