Surprizë në Korçë! Skënderbeu ka marrë një fitore mjaft të rëndësishme ndaj Egnatias, duke triumfuar me rezultatin minimal 1-0 dhe duke i dhënë një tjetër zhvillim garës për kreun e “Abissnet Superiore”.
Heroi i takimit për vendasit ishte Lagonidis, i cili gjeti rrugën e rrjetës që në minutën e dytë, duke i dhënë avantazhin skuadrës korçare. Pas golit, Skënderbeu administroi me kujdes lojën, ndërsa në disa momente krijoi mundësi të tjera për të thelluar rezultatin.
Situata u komplikua edhe më shumë për miqtë në fundin e pjesës së parë. Kapiteni Albano Aleksi u ndëshkua për herë të dytë me karton të verdhë, duke lënë Egnatian me një lojtar më pak për gjithë fraksionin e dytë.
Pavarësisht përpjekjeve pas pushimit, rrogozhinasit nuk arritën të ndryshonin fatin e takimit. Kampionët në fuqi tentuan të reagonin, por Skënderbeu u tregua i kujdesshëm dhe ruajti avantazhin deri në vërshëllimën përfundimtare.
Për korçarët pati edhe një shqetësim gjatë ndeshjes, pasi portieri Dobiani u detyrua të largohej për shkak dëmtimi, duke i lënë vendin Alisë.
Kjo humbje mund të rezultojë e kushtueshme për Egnatian, e cila mbetet në kuotën e 27 pikëve. Diferenca mund të ngushtohet në varësi të rezultatit të Teutës në përballjen me Laçin në Rrogozhinë.
Në krahun tjetër, Skënderbeu merr tri pikë me shumë peshë, ngjitet në vendin e tretë me 17 pikë dhe konfirmon se gara në këtë sezon të Superiores mbetet më e hapur se kurrë.