Shqipëria e ka nisur me humbje epokën e re nën drejtimin e Rolando Maran. Kuqezinjtë u mposhtën me rezultatin 0-1 nga Izraeli në miqësoren e zhvilluar në stadiumin “Air Albania”, në atë që ishte prova e parë e teknikut italian në stolin e Kombëtares.
Pjesa e parë u karakterizua nga ritëm i ulët dhe pak raste për shënim, ndërsa në fraksionin e dytë Izraeli arriti të gjejë golin e avantazhit me Oskar Gloukh në minutën e 73-të. Festimi i futbollistit izraelit shkaktoi tension në fushë, pasi gjesti i tij drejt tifozëve shqiptarë solli reagimin e Elseid Hysajt. Të dy lojtarët u ndëshkuan me karton të verdhë nga arbitri.
Pas golit, trajneri Maran provoi disa lëvizje për të ndryshuar rrjedhën e ndeshjes, por Shqipëria nuk arriti të rikthehej në rezultat. Në fund, sfida u mbyll me fitoren minimale të Izraelit, ndërsa tekniku italian mori indiciet e para për grupin që do të drejtojë në vazhdim.
Pavarësisht rezultatit negativ, kjo ndeshje shërbeu si testi i parë për Rolando Maran, i cili tashmë do të ketë mundësinë të analizojë performancën e skuadrës dhe të ndërtojë identitetin e tij në krye të Kombëtares shqiptare.