Vllaznia do të luajë në Ballsh në kuadër të javës së 33-të të Superiores. Me sfidën që do luhet ditën e diel, në orën 16:00, në stadiumin “Adush Muça”. Një duel që i gjen shkodranët përballë Bylisit, me mallakastriotët të “etur” për pikë në Superiore. Ku ballshiotët kërkojnë t’i largohen zonës së rënies nga kategoria. E ndërsa shkodranët synojnë renditjen në dy vendet e para. Ajo çfarë duket se kënaq në kampin shkodran para këtij dueli është kompletimi thuajse në total i skuadrës.
Kështu Bekim Balaj është rikuperuar në kohë rekord pas vizitës në Serbi, me sulmuesin që pritet të jetë titullar në këtë duel. E ndërsa shenja pozitive ka dhënë edhe Mensah, pavarësisht se për ganezin do vendoset në momentet e fundit nëse do jetë pjesë e sfidës apo jo. Në pozicionet e tjera në formacion te kuqeblutë pritet të mos ketë shumë ndryshime. Ku nga porta do e nisë tashmë titullari i zakonshëm, Jukaj.
Në mbrojtje po ashtu nuk ka dyshime, me titullarët e zakonshëm Bajrami e Stojanoviç në qendër e me Gurishten djathtas dhe Jagon majtas. Në mesfushë priten treshja Deliu, Krymi dhe Sala. Pavarësisht se janë bërë prova edhe me Malën në këtë repart. Por prizrenasi pritet të rreshtohet në krahun e djathtë të sulmit shkodran. Me Gruden e Dodajn që duelojnë mes tyre për pozicionin e sulmuesit të djathtë. E në majë të manovrës sulmuese të kuqebluve rikthehet pas dy ndeshjesh mungesë kapiteni Balaj.
STATISTIKAT – Statistikat e këtij sezoni në përballjet e çiftit Bylis-Vllaznia tregojnë se kur këto dy skuadra ndeshen, triumfues del gjithmonë ekipi vendas. Kështu në fazën e parë, me ndeshjen e luajtur në Shkodër ishin shkodranët që triumfonin 2-0, falë golave të Stojanoviç dhe Balajt. Ballshiotët do i kthenin “reston” kuqebluve në duelin e fazës së dytë. Ku mallakastriotët fitonin në “Adush Muça” me shifrat 1-0. Kjo falë një rrjete të Malomos në minutën e 10-të të takimit.
Tradita e fitoreve të ekipit pritës në këtë çift do vijonte edhe në ndeshjen e fazës së tretë. Do ishte sërish Vllaznia që do fitonte pastër në Shkodër, në shifrat 3-0 kundër Bylis. Duel që vendosej nga autogoli i Camara dhe golat e Stojanoviç dhe Kahrimanoviç për 9 herë kampionët e vendit. Të dielën do shikohet nëse dy ekipet do i qëndrojnë “besnikë” kësaj statistike apo do arrihet të thyhet “tradita” e fitoreve të ekipit vendës.