Tirana vazhdon të marrë frymë me optimizëm dhe konfirmon momentin pozitiv në Abissnet Superiore. Bardheblutë kanë triumfuar me rezultatin minimal 1-0 ndaj Laçit, në sfidën e javës së shtatë të kampionatit, të zhvilluar në Vorë. Heroi i kryeqytetasve ishte Daci, i cili me golin e realizuar në minutën e 77-të i dha skuadrës së tij tri pikë me shumë vlerë.
Pas suksesit të madh në derbi ndaj Partizanit, Tirana konfirmon se fitorja ndaj rivalëve të përjetshëm nuk ishte një shkëndijë e momentit. Skuadra e drejtuar nga Klafuriç ka gjetur vazhdimësinë dhe po ngjitet gradualisht në renditje, duke shkuar në kuotën e 11 pikëve dhe duke mbajtur vendin e katërt.
Sfida ndaj Laçit nuk rezultoi aspak e lehtë për bardheblutë. Tirana provoi të gjente rrugën e rrjetës dhe ia doli ta dërgonte topin në portë edhe në raste të tjera, por festimi u ndërpre nga pozicionet jashtë loje. Në minutën e 69-të, Daci mendoi se kishte zhbllokuar rezultatin, por goli u anulua për pozicion të parregullt.
Megjithatë, sulmuesi nuk u dorëzua dhe vetëm tetë minuta më vonë do të gjente momentin e duhur për të bërë diferencën. Pas një aksioni të ndërtuar nga krahu i djathtë, Berisha dërgoi topin drejt shtyllës së dytë, ku Daci ndërhyri saktë dhe e devijoi në rrjetë, duke shpërthyer festën bardheblu.
Tirana gjeti edhe golin e dytë në minutën e 81-të me Berishën, pas një aksioni të gjatë të skuadrës kryeqytetase. Por edhe këtë herë festa u ndërpre, pasi realizimi u anulua për pozicion jashtë loje.
Për Tiranën, fitorja është një tjetër sinjal se skuadra mund të synojë më shumë në këtë sezon. Për Laçin, ndërkohë, dy humbjet radhazi ndezin nevojën për reagim, në mënyrë që ekipi të mos largohet më tej nga grupi i skuadrave që luftojnë në pjesën e sipërme të tabelës.