Mitrovica e vajzave është mundur në raundin e parë të Champions League me shifrat 4-0 ndaj ekipit rumun Farul Constanta. Një ndeshje aspak e hijshme, tifozët rumunë bënë thirrje anti-Kosovë dhe shfaqën flamurin serb në stadium. Një ndeshje që u ndërpre për disa minuta pas protestave nga stafi i Mitrovicës.
Pas përfundimit të ndeshjes, Federata e Futbollit e Kosovës reagoi ashpër ndaj sjelljeve të papranueshme të tifozëve rumun gjatë ndeshjes së Ligës së Kampionëve për femra ndërmjet Farul Constanta dhe Mitrovicës, e cila u zhvillua, të mërkurën, në stadiumin “Central Stadium Hagi Academy” në Constanta.
Shfaqja e flamujve të Serbisë dhe thirrjet kundër shtetit të Kosovës janë veprime të papranueshme dhe të dënueshme, e që bien ndesh me frymën e futbollit dhe ‘fair play’-it.
FFK do të dërgojë një notë proteste zyrtare në Federatën e Futbollit të Rumanisë dhe në UEFA, duke kërkuar ndëshkime dhe veprime konkrete ndaj provokimeve të tilla dhe për të parandaluar përsëritjen e situatave të ngjashme në të ardhmen.