Disa prej emrave të njohur të botës së krimit në Shqipëri, të cilët janë duke vuajtur dënimin në burgun e Peqinit, Bradasheshit dhe Drenovës në Korçë, janë shpallur fajtorë dhe dënuar nga gjykata e Elbasanit.
Emra të njohur si Gazmir Braka ose “Gaxhai” i Vlorës dhe Aleksandër Llanaj, të dënuar me burgim të përjetshëm për krime në vitin 1997 dhe masakrën e “Qoles”, kanë marë një dënim tjetër. Ka qenë gjyqtarja e Elbasanit, Matilda Fetau, e cila në datën 10 shkurt 2023, ka vendosur të pranojë kërkesën e prokurorisë duke shpallur fajtor dhe dënuar, me 1 vit e 7 muaj burg Gazmend Brakën dhe me 3 vjet e 4 muaj burgim, Aleksandër Llanaj.
Gazmir Braka, rezulton se kishte futur në qeli një aparat telefonike dhe mbante kontakte me njerëzit jashtë burgut dhe vetë gardianët, siç është njëri prej tyre i përgjuar nga prokuroria, Olgert Muçka.
Aleksandër Llanaj, është një tjetër i dënuar që përveç se kishte futur një aparat telefoni në ambjentet e burgut të Drenovës, ai kishte krijuar brenda në burg një zinxhir komunikimesh për vendosjen e basteve sportive nga brenda ambienteve të burgut.
Një tjetër personazh që vuan dënimin me burgim të përjetshëm për vrasjen e tre shtetasve në 28 korrik 2013 në Vlorë, Sokol Isufaj, Serdi Bajlozi dhe Diana Ademi, rezulton të jetë Delin Hajdari. Edhe ky i fundit sipas vendimit të gjykatës, kishte arritur të fuste një aparat telefoni në ambientet e qelisë së tij, dhe për këtë fakt është dënuar sërish me 1 vit e 7 muaj burgim.
Po me të njëjtën masë dënimi 1.7 vite burgim, është shpallur fajtor për akuzën e “Organizim të lotarive të palejuara” dhe “Futjen e Telefonave në burg” Aleksandër Alibashi. Edhe ky i fundit, vuan dënimin me burg përjetë në Drenovë për një krim të kryer disa vite më parë në Vlorë.
Vendimi i Gjykatës së Elbasanit
1. Gazmir Braka dënohet me 1 vit e 7 muaj burgim
2. Aleksandër Llanaj dënohet me 3 vjet e 4 muaj burgim
3. Delin Hajdari dënohet me 1 vit e 7 muaj burgim
4. Aleksandër Sinanaj dënohet me 1 vit e 7 muaj burgim
5. Aleksandër Alibashi dënohet me 1 vit e 6 muaj burgim
6. Ilia Beshello dënohet me 1 vit e 4 muaj burgim
7. Metkë Nurçelli dënohet me 1 vit e 4 muaj burgim (Vënie në Kusht)
8. Olgert Muçka dënohet me 1 vit e 4 muaj burgim (Vënie në kusht)
9. Artan Dulillari dënohet me 1 vit e 4 muaj burgim (Vënie në kusht)
10. Veli Bici dënohet me 1 vit e 4 muaj burgim (Vënie në kusht)