Reagimi i furishëm i Cristiano Ronaldos (i cili në mënyrë të dukshme hodhi shiritin e kapitenit në tokë pasi goli nuk iu dha në ndeshjen kundër Serbisë) mund t’i kushtojë me një diskualifikim sulmuesit të Portugalisë dhe Juventusit.
Sipas “Iusport”, protesta e qartë kundër gjyqtarit holandez Makkelie mund të interpretohet si shkelje e nenit 11 të kodit disiplinor të FIFA-s.
Sjelljet që diskreditojnë futbollin dhe organin më të lartë drejtues, në fakt, mund të sanksionohen me rregullore. Përveç dënimit, rreziku është pra një diskualifikim.
Ylli 36-vjeçar lëshoi fushën para se të përfundonte takimi, derisa bënte me shenjë se ky takim për të ka përfunduar.
Vërehet qartë se topi kishte kaluar vijën e portës, mirëpo për shkak se në kualifikimet për Botëror nuk është implementuar ende VAR-i dhe teknologjia kur topi kalon vijën (goal line technology), portugezi do të mbetet pa këtë gol në llogarinë e tij.
Takimi mes Serbisë dhe Portugalisë përfundoi 2-2, e që pesë herë fituesi i Topit të Artë kishte të drejt të acarohet me golin e padhënë.
Burimi: Telegrafi