Nuk ka më emocione në stadiumin “PGE Narodowy”, ku Polonia siguroi fitoren 2-1 ndaj Shqipërisë në gjysmëfinalen e play-off-it për Kupën e Botës, falë golave të Robert Lewandowski dhe Piotr Zielinski.
Sfida nisi më mirë për kuqezinjtë, të cilët mbyllën pjesën e parë në avantazh 1-0, duke surprizuar vendasit. Por në pjesën e dytë, skuadra e drejtuar nga Jan Urban reagoi shpejt dhe brenda pak minutash përmbysi gjithçka.Fillimisht ishte Lewandowski që riktheu baraspeshën, ndërsa më pas Zielinski realizoi golin e fitores për polakët, duke vulosur kualifikimin.
Megjithatë, përtej rezultatit, ajo që mori vëmendje të madhe ishte sjellja e kapitenit polak pas vërshëllimës finale. Robert Lewandowski tregoi klasin e një lideri të vërtetë, duke iu afruar lojtarëve shqiptarë për t’i ngushëlluar pas humbjes, përpara se të festonte me shokët e skuadrës. Një gjest i thjeshtë, por që tregon respekt dhe sportivitet në një ndeshje me shumë tension.