Pas shkarkimit të Orges Shehit nga pankina, klubi i Tiranës duket se nuk ka humbur kohë. Burime jo zyrtare bëjnë me dije se drejtuesit kryeqytetas do t’ia besojnë pankinën Julian Ahmatajt. Një trajner që vijon të jetë pjesë e familjes, teksa është drejtues i Akademisë bardheblu.
Largimi i Shehit nga nënkampionët e Shqipërisë vjen në një moment jo të mirë për bardheblutë, të cilët u mposhtën 3-0 nga Laçi në shtëpinë e tyre. Tashmë, koha në dispozicion dhe njohja me lojtarët, ka nxjerrë në “pole-position” Ahmatajn për të rinisur edhe një herë punën me Tiranën.
Aktualisht bardheblutë gjenden në vendin e katërt të Superiores me 10 pikë, ndërsa pritet me interes të shihet se si do të vijojë aventura e tyre në të ardhmen.