Bylis ka ndërprerë bashkëpunimin me Darko Ilieskin. Klubi ballshiot ka njoftuar zyrtarisht vendimin e marrë për mbrojtësin, që u afrua në merkaton e dimrit.
POSTIMI I BYLIS
“FK BYLIS ka ndërprerë bashkëpunimin me mbrojtësin Darko Ilieski. FK Bylis e falënderon Ilieskin, për kontributin e dhënë në realizimin e objektivit, në skuadrën e parë, por njëkohësisht i uron suksese në vijimin e karrierës së tij”, shkruan klubi ballshiot në rrjetet sociale.
Ilieski luajti 13 takime në kampionat, ndërsa shënoi edhe një gol. Bylisi ndërkohë siguroi mbijetesën në Superiore.
SKENDERBEU 1-2 KF BYLIS
Mbyllet sezoni i rregullt në Superiore, me të gjithë verdiktet e dhëna, jo pa ndonjë befasi.Befasia në skuadrat që ranë nga kategoria erdhi nga Korça, ku Skënderbeu është mposhtur 1-2 nga Bylis, duke u kthyer në Kategorinë e Parë pikërisht një vit para se të përfundojë dënimi 10 vjeçar nga UEFA. Bardhekuqtë duhet vetëm të fitonin në sfidën direkte me ballshiotët, por të besuarit e Ernest Gjokës kanë dështuar, duke u rrëzuar nga kategoria. Mustafa ngriu Korçën me golin e parë që i dha besim formacionit të Mezanit, por Bismark iluzionoi për pak kohë gjithë ambjentin. Vendosi në fund Përgjoni, që heshti një stadium të tejmbushur me tifozët korçarë që kërkonin të shtynin ekipin e tyre drejt shpëtimit. Festuan ballshiotët, që këmbëngulën në një sezon ku dukej se gjithcka ishte e vendosur. Bie Skënderbeu në javën e fundit, pikërisht atëherë kur dukej se i kishte fatet në duart e tij.
Comments are closed