Dorant Ahmetaj dhe Besa kanë mbyllur bashkëpunimin pas përfundimit të kontratës mes palëve. Portieri 24-vjeçar nuk do të jetë pjesë e skuadrës kavajase në sezonin e ardhshëm, duke i dhënë fund një aventure trevjeçare me fanellën verdhezi.
Gardiani nga Gjilani ka qenë pjesë e rëndësishme e ekipit gjatë viteve të fundit, por sezoni i fundit rezultoi më i vështirë për të sa i përket aktivizimit. Konkurrenca e lartë në repartin e portës, ku Besa kishte në dispozicion edhe Mustafë Abdullahun dhe Endri Demën, kufizoi ndjeshëm hapësirat e Ahmetajt.
Megjithatë, e ardhmja e portierit pritet të vendoset shpejt. Interesi për të mbetet i lartë, me disa klube nga kampionati shqiptar dhe nga Kosova që kanë shfaqur interes konkret për të siguruar shërbimet e tij. Përvojat e mëparshme në futbollin kosovar mund ta bëjnë një rikthim atje një opsion të mundshëm për 24-vjeçarin.