Elbasani ka zyrtarizuar goditjen e parë në merkaton e verës, duke afruar në skuadër sulmuesin e krahut Edoly Lukoki. Verdheblutë kanë befasuar me këtë transferim, pasi bëhet fjalë për një futbollist të ri me eksperiencë në futbollin holandez.
22-vjeçari vjen pas aventurës së tij me Eindhoven në kategorinë e dytë të Holandës, ndërsa aktivizohet kryesisht në krahun e majtë të sulmit. I lindur në Francë dhe me origjinë nga Kongo, Lukoki ka qenë pjesë e përfaqësueseve zinxhir të Francës, duke u aktivizuar deri te kombëtarja U-18.
Pavarësisht mundësisë për të vazhduar bashkëpunimin, Eindhoven vendosi të mos rinovojë kontratën e futbollistit, duke i hapur rrugën transferimit të tij në Superiore.
Për Elbasani-n, Edoly Lukoki është afrimi i parë i kësaj vere dhe një sinjal i qartë i ambicieve të klubit për sezonin e ri. Verdheblutë po përgatiten për sfidat europiane dhe synojnë të ndërtojnë një skuadër sa më konkurruese për paraqitjen në arenën ndërkombëtare.