Vllaznia vijon përgatitjet për sezonin e ri. Kuqeblutë kanë në fokus Conference League, ku në turin e parë do të ndeshen me letonezët e Daugavpils. Trajneri Edi Martini po punon maksimalisht me grupin aktual, ndërsa një mbrojtës nga edicioni i kaluar nuk bën pjesë në planet e tij.
Kështu, qendërmbrojtësi shkodran Serjan Repaj, që u afrua për repartin defensiv në merkaton e janarit, nuk është në llogaritë e trajnerit. Shkodrani u afrua si futbollist i lirë në fillimin e janarit të këtij viti. Megjithatë, duke mos qenë në planet e trajnerit Martini, është vendosur që palët të ndërprejnë kontratën.
NDESHJA NË CONFERENCE LEAGUE
Shorti i Conference League ka vendosur Vllazninë përballë BFC Daugavpils në turin e parë të këtij kompeticioni. Ndeshja e parë do të zhvillohet në Shqipëri dhe e dyta në Letoni, por me sa duket, asnjëra në qytetin e skuadrave përkatëse.
Por edhe kundërshtari i klubit shkodran BFC Daugavpils ka probleme me stadiumin “Celtnieks” në Dougavpils, pasi ai nuk plotëson standardet e kërkuara nga UEFA. Kësisoj, ndeshja me shkodranët është zhvendosur në kompleksin privat “LNK Sporta Parks” në Riga, në qytet tjetër, pasi ai plotëson standardet minimale që kërkon UEFA për kompeticionet e saj.
Vllaznia do të përballet me letonezët e BFC Daugavpils, të cilët në këtë edicion bëjnë debutimin e tyre ndërkombëtar. Skuadra letoneze ka pak histori suksesi në vendin e vet, pasi ka qenë për shumë vite në kategoritë e ulëta, para se të ngjitej në elitë, por pa arritur objektiva ambiciozë.