Tirana do të udhëtojë këtë të premte drejt Vlorës, ku do të përballet me Flamurtarin në ndeshjen e vlefshme për javën e 30-të të “Abissnet Superiore”. Takimi është programuar të startojë në orën 19:00. Ndërkohë, bardheblutë kanë intensifikuar përgatitjet në stadiumin “Selman Stërmasi”, duke u fokusuar maksimalisht për këtë sfidë vendimtare. Trajneri Orges Shehi ka qenë shumë kërkues ndaj lojtarëve, duke i ndjekur nga afër dhe duke i orientuar gjatë gjithë seancave stërvitore.
Zëri i teknikut nuk ka munguar në fushë, por gjithçka ka ardhur në funksion të motivimit dhe rritjes së shpirtit garues të skuadrës. Aktualisht, Tirana renditet në vendin e parafundit me 27 pikë, po aq sa Vora që mban vendin e tetë. Ndërkohë, Flamurtari ndodhet në fund të tabelës me 24 pikë.