Pogradeci vazhdon të vendosë piketat në merkato. Klubi liqenor po lëviz me kujdes për të sjellë në skuadër elementët që pritet ti bëjnë punë trajnerit Ardian Mema. Mësohet se Pogradeci ka arritur akordin me Eni Imamin. Pas dy sezonesh me Vorën, ku ishte pjesë kyçe e ngjitjes historike në Superligë dhe titullit kampion në Kategorinë e Parë, 32-vjeçari mbeti lojtar i lirë, pasi nuk pati kontakte për rinovim nga drejtuesit vorakë.
Tashmë ai i bashkohet liqenorëve, për të ndihmuar në realizimin e objektivave sezonalë së bashku me Ardian Memën që në të shkuarën kanë qenë pjesë e Tiranës. Në karrierën e tij, Imami ka veshur fanellat e Tiranës, Vllaznisë, Dinamos, Kukësit, Skënderbeut, Teutës dhe Flamurtarit. Duhet theksuar se ky profil mbrojtësi, veçanërisht me këmbën e majtë, i ka munguar skuadrës dhe pritet të sjellë ekuilibër në prapavijë.