Mario Mitaj, një nga talentet kuqezi, pritet të mbyllë kapitullin në Arabinë Saudite. Në Greqi ndezin hipotezën e bujshme, me mediat që flasin për një interesim nga ana e AEK-ut të Athinës, ekipi ku Mitaj u bë i njohur. Futbollisti shqiptar është nën kontratë me Al Ittihad deri në 2028, por fakti që nuk shihet më si titullar i paprekshëm, ka bërë që palët, klubi saudit dhe lojtari, të ulën në të një tavolinë për të diskutuar në lidhje me të ardhmen.
“Sport24”, media sportive në Greqi, zbulon se është trajneri i AEK, Marko Nikolic që po shtyn klubin për të siguruar shërbimet e Mario Mitaj. Kartoni i tij vlerësohet në treg me 5,5 milionë euro, një shifër që klubi nga Athina mund ta investojë pasi bëhet fjalë për një lojtar vetëm 22-vjeç, me shumë të ardhme. Në Athinë, nëse do të vihej në jetë një rikthim i tij, Mitaj do të gjente edhe dy miqtë e tij në Kombëtare, Thomas Strakoshën dhe Stavro Pilo-n.