Egnatia dhe Elbasani ndanë pikët në një barazim spektakolar 2-2, në ndeshjen e vlefshme për javën e 20-të të Superiores. Takimi dhuroi emocione, gola dhe tension deri në minutat e fundit, me të dyja skuadrat që luftuan fort për fitoren.
Elbasani ishte më konkret në pjesën e parë dhe kaloi në avantazh në minutën e 35-të me Loukilin, i cili përfitoi nga një hapësirë në mbrojtjen e vendasve. Në fillimin e fraksionit të dytë, verdheblutë dyfishuan shifrat me Lajthian në minutën e 50-të, duke vënë Egnatian në vështirësi.
Reagimi i kampionëve në fuqi nuk vonoi. Në minutën e 63-të, Fernando ngushtoi diferencën nga pika e bardhë e penalltisë, pas një faulli në zonë. Presioni i Egnatias u rrit dhe sërish Fernando u tregua i saktë nga 11 metrat në minutën e 76-të, duke rikthyer baraspeshën dhe duke vendosur rezultatin përfundimtar 2-2.
Në minutat e mbetura, të dyja skuadrat tentuan të gjenin golin e fitores, por pa mundur të ndryshojnë shifrat. Një barazim që reflektroi atë që u pa në fushë, me Elbasanin që largohet me një pikë të çmuar nga Rrogozhina dhe Egnatian që ndalet, por ruan pozicionet e saj në renditje.