Rrugët mes Victor Da Silva-s dhe Partizanit janë ndarë para kohe. Sulmuesi brazilian, ka ndërprerë kontratën me të kuqtë pas një periudhe të vështirë, ku nuk arriti të gjejë vazhdimësi në aktivizim.
Da Silva u paraqit këtë sezon vetëm në 5 ndeshje zyrtare, ndërsa takimi i fundit me fanellën e Partizanit daton në muajin tetor, përballë Flamurtarit. Gjendja fizike dhe pamundësia për të qenë në nivelin optimal kanë ndikuar që palët të vendosin me mirëkuptim për ndarjen.
31-vjeçari nuk është një emër i panjohur për futbollin shqiptar, pasi më herët ka veshur edhe fanellat e Vllaznisë dhe Bylisit. Tashmë, e ardhmja e tij mbetet e hapur, me Da Silvën që mund të përfaqësojë një mundësi të mirë për çdo skuadër të Superiores, falë eksperiencës dhe cilësive teknike që vijojnë të jenë të padiskutueshme.