Jasir Asani është zyrtarisht lojtar i Esteghlal. Siç pritej, klubi nga Irani ka blerë kartonin e sulmuesit shqiptar nga Gwangju për rreth 1 milion euro. Esteghlal nuk ka pritur fundin e kontratës, për ta pasur Asanin në dispozicion. Dhe pse u tha fillimisht se do të bashkohet me ekipin e ri në janar, marrëveshja ndryshoi duke i lënë të gjithë palët e kënaqura.
Klubi ku do të luajë Asani është legjendar në Iran, ndryshe edhe më i njohuri atje. Esteghlal ka mbështetje të madhe të tifozëve, që e kanë treguar edhe në postimet e sulmuesit të Kombëtares shqiptare. Asani po provon një tjetër eksperiencë të re. Pas Koresë së Jugut ishte radha e Iranit për t’u shtuar në listën e tij.
Asani nuk mund të largohej pa fjalët e lamtumirës me Guangjun. Sulmuesi i Kombëtares shqiptare shpreh mirënjohjen e tij për kohën e kaluar te koreanët dhe arritjet si pjesë e tyre.
Letra e Asanit:
“Thonë se gjithçka është shkruar tashmë, fillimi dhe fundi. Kjo ishte historia jonë me Guangjun, 2 vite e gjysmë të paharrueshme, të mbushura me kujtime, emocione të forta, momente gëzimi, festimesh, por edhe momente trishtimi. Por mbi të gjitha, ishte një histori që do të lërë përgjithmonë gjurmë në jetën time.
Tani ka ardhur koha të largohem nga shtëpia ime, klubi që më rriti, më formoi dhe më dha mundësinë të përfaqësoja Kombëtaren shqiptare, ku ëndrra ime e fëmijërisë u bë realitet dhe luajta me krenari në Kampionatin Evropian.
Mund të shkruaja për ditë të tëra për atë që ky klub dhe ky qytet do të thotë për mua, por asnjë fjalë nuk do të jetë e mjaftueshme për të përshkruar mirënjohjen time.
Përgjithmonë mirënjohës që u rrita përkrah Guangju, përgjithmonë mirënjohës për udhëtimin që patëm së bashku. Forca Guangju!”