Vllaznia kundër historisë sonte në mbremje. Kuqeblutë e drejtuar nga Migen Memelli kanë një mision shumë të vështirë, të kthejnë në favor humbjen 3-1 të një jave më parë. Kundër Linfield, skuadra veriore ka në krah statistikat dhe leksion më të mirë se ai i sezonit 2021-2022 nuk mund të ketë. Në sfidën e raundit të parë dnaj Siroki Brijeg, Vllaznia u mund 3-1 në Bosnje por sfida e kthimit foli për kuqeblutë që e kthyen situatën në favor me fitoren 3-0 duke siguruar biletën e raundit të dytë, një rutinë për shkodranët të cilët nuk dështojnë në tentativën për të kaluar fazën e parë që prej 20 vitesh.
Ishte sezoni 2003–04 në Kupën UEFA kur Vllaznia pësoi për herë të fudnit disfatë që në raundin e parë kundër skocezëve të Dundee dhe që prej atij sezoni, në 7 pjesëmarrjet e radhës deri në vitin 2022, shkodranët kanë shkuar minimalisht deri në raundin e dytë.
Statistikat flasin në favor por sonte duhet të flasë edhe fusha në stadiumin “Loro Borçi” pasi Linfield është një kundërshtar i vështirë edhe pse jo i pakalueshëm. Stërvitja e fundit në stadium i ka dhënë sinjale pozitive trajnerit korçar që gjithsesi nuk do të ketë një mbështetje masive në shkallë. Balaj që nga minuta e parë në majën e sulmit është pika e referimit dhe emri që frymëzon më shumë ndërsa nhga tribuna do të ulet kapiteni i rikthyer Ardit Krymi në pamundësi për ta luajtur këtë ndeshje.