Ndeshja mes Skënderbeut dhe Vllaznisë e vlefshme për javën e 27-të të “Abissnet Superiore”, është mbyllur me fitoren e shkodranëve. Sfida e zhvilluar në stadiumin “Skënderbeu” të Korçës ka përfunduar me rezultatin 0-1 në favor të miqve. Pas kësaj sfide për mediat ka folur trajneri i Vllaznisë, Qatip Osmani.
“Sigurisht që kjo loja që thoni cinike, na dha rezultatin. Prapë dhe sot e fitoi loja defensive. Patëm disa raste, kundërshtari pati raste më të mira. Megjithatë, bravo u qoftë djemve për angazhimin.
Sigurisht, jemi afër, 2 pikë është diferenca. Duhet të sulmojmë dhe vendin e parë. Me angazhimin e Çobës, na duhej një lojtar i krahut për shpejtësinë. Barrën më të madhe e kanë lojtarët që kanë luajtur. Titullin kampion? Jo Qatip Osmani. Nuk jam unë që do e sjellë, por lojtarët. Ne do të bëjmë çmos”, u shpreh Osmani.