Tirana vijon me problemet. Pas Kolës, mësohet se mbrojtësi francez Mahamadu Dembele ka probleme fizike. Pas ekzaminimeve të para, diagnoza është një tërheqje muskulore që pritet ta mbajë jashtë fushave për rreth një muaj. Ky është një lajm i keq për trajnerin Vangjel Mile, i cili tashmë ka humbur një nga shtyllat kryesore të prapavijës. Dembele mungoi automatikisht edhe në ndeshjen e javës së dytë dhe, për më tepër, i shtohet listës së të dëmtuarve ku ndodhen edhe Kola dhe Meta.
Praktikisht, Tirana ndodhet pa asnjë mbrojtës qendre të natyrës së parë. Në këtë situatë, stafi teknik është i detyruar të bëjë improvizime. Emrat që shihen si alternativë janë Lleshi dhe Marku, të cilët do të duhet të sakrifikojnë duke luajtur në një rol jo natyral për ta. Ky është një risk i madh, pasi mungesa e specialistëve në qendër të mbrojtjes mund të lërë hapësira për kundërshtarët, sidomos në përballjet e forta që Tirana ka përpara.