Tirana mori sot humbjen e dytë radhazi në kampionat. Pas disfatës në derbi, bardheblutë u mposhtën edhe nga Egnatia në ndeshjen e zhvilluar sot në “Selman Stërmasi”. Ultrasit e Tiranës kanë kritikuar klubin e tyre të zemrës përmes një postimi në llogarinë e tyre zyrtare në “Facebook”. “Tirona Fanatics” ka shkruar se klubi i ka censuruar edhe komentet kritikuese në rrjetet sociale, çka i shtyn ata të dalin kundër kryesisë së skuadrës së tyre të zemrës.
Ndërkohë që klubi zhytet sërish në një paaftësi për tu pasur zili dhe nga klubet e kategorisë së 3-të, gjen kohën të censurojë dhe të bllokojë komentet në faqet e tij në rrjetet sociale! Ju ftojmë të gjithëve të bëni këtu komentet tuaja që u censuruan te faqja e Kf Tirana dhe TF do të përkujdeset nesër që të giitha të arrijnë në kutinë postare të Kf Tirana! Ky nuk është hapi i parë i luftës sonë të re! Për hapat që do të ndjekim do të ju njoftojmë në vijim! Askush nuk luan dot me TIRONËN”, ka shkruar grupimi “Tirona Fanatics”.