Teuta dhe Tirana janë ndalur në barazim 1-1 në sfidën e zhvilluar në stadiumin e Durrësit, një takim i shoqëruar jo vetëm me gola, por edhe me tensione dhe protesta. Tirana e nisi ndeshjen në mënyrën më të mirë të mundshme, duke kaluar në avantazh që në minutën e 4-të me Ndong, i cili përfitoi nga një moment hutimi në mbrojtjen vendase dhe dërgoi topin në rrjetë.
Teuta reagoi gradualisht dhe arriti të barazojë në minutën e 31-të. Arbitri Barjamaj akordoi një penallti për durrsakët, vendim që u kundërshtua ashpër nga kampi bardheblu. Nga pika e bardhë u tregua i saktë Beshiraj, i cili vendosi ekuilibrin në rezultat.
Kontestimet e Tiranës ndaj penalltisë vijuan edhe pas përfundimit të pjesës së parë. Para nisjes së fraksionit të dytë, lojtarët dhe stafi teknik i Tiranës protestuan duke mos u shfaqur në fushë për rreth 10 minuta, si shenjë pakënaqësie ndaj vendimit arbitral.
Pas rifillimit të lojës, të dyja skuadrat u përpoqën të gjenin golin e fitores, por pa sukses. Rastet u shpërndanë në të dy portat, ndërsa ndeshja u karakterizua nga luftë sportive dhe ndërhyrje të forta.
Në fund, Teuta dhe Tirana u desh të kënaqeshin me nga një pikë, në një përballje që do të mbahet mend më shumë për tensionin dhe episodet jashtë fushës sesa për rezultatin përfundimtar.